وفاقی وزیر خزانہ محمد اورنگزیب سے انٹرنیشنل فنانس کارپوریشن کے وفد نے ملاقات، جس میں مختلف امور پر بریفنگ دی گئی۔ وزیر خزانہ نے کہا کہ پاکستان کے قرضہ اور ایکویٹی میں نمایاں بہتری آئی ہے۔ آئی ایف سی نے گرین انرجی، ڈیٹا سینٹرز، زرعی سپلائی چین کی بہتری، ٹیلی کام سیکٹر میں تعاون کی یقین دہانی کرائی۔
وفاقی وزیر خزانہ محمد اورنگزیب سے انٹرنیشنل فنانس کارپوریشن کے وفد نے ملاقات کی، جس میں ایم ڈی اور ایگزیکٹو نائب صدر مختار دیوپ، ریجنل نائب صدر، ریجنل ڈائریکٹر مشرق وسطیٰ، پاکستان اور کنٹری ڈائریکٹر عالمی بینک بھی شامل تھے۔
وزیر خزانہ محمد اورنگزیب نے آئی ایف سی کے نجی شعبے کے ساتھ حالیہ معاہدوں کو سراہا، وزیر خزانہ نے وفد کو پاکستان کی معاشی استحکام سے متعلق بریفنگ دی۔
ملاقات کے حوالے سے جاری اعلامیے میں بتایا گیا ہے کہ وزیر خزانہ نے آئی ایف سی کو آئی ایم ایف کی منیجنگ ڈائریکٹر کرسٹالینا جارجیوا سے دبئی میں ملاقات کا حوالہ دیا اور بتایا کہ کرسٹالینا جارجیوا نے پاکستان کی معاشی بہتری کی پیشرفت کو سراہا۔
ایم ڈی انٹرنیشنل فنانس کارپوریشن نے کہا کہ پاکستان کا کنٹری پارٹنر شپ فریم ورک بہترین ماڈلز میں سے ہے۔ مختار دیوپ نے پاکستان کے ساتھ آئی ایف سی کے قریبی تعاون کے عزم کو دہرایا اور گرین انرجی، ڈیٹا سینٹرز، زرعی سپلائی چین کی بہتری، ٹیلی کام سیکٹر میں تعاون کی یقین دہانی کرائی۔
اعلامیہ کے مطابق آئی ایف سی کے ایم ڈی نے ڈیجیٹلائزیشن جیسے کلیدی شعبوں میں معاونت فراہم کرنے کا بھی یقین دلایا۔
وزیر خزانہ نے کہا کہ ڈیوس ملاقات کے بعد پاکستان کے قرضہ اور ایکویٹی میں نمایاں بہتری آئی۔ انہوں نے کلیدی ڈھانچہ جاتی اصلاحات پر بھی روشنی ڈالی۔
