وزیرخزانہ محمد اورنگزیب کی زیرصدارت پیٹرول پرائسز مانیٹرنگ کمیٹی کا اجلاس ہوا جس دوران ملک میں پیٹرولیم مصنوعات کی قیمتوں اور سپلائی کی صورت حال کا جائزہ لیا گیا ، بریفنگ میں بتایا گیا کہ عالمی بحران کےباوجود پاکستان میں پیٹرول اورڈیزل کی سپلائی مستحکم ہے،ملک میں فی الحال ایندھن کے وافرذخائر موجود ہیں۔
حکام پیٹرولیم ڈویژن نے بریفنگ دیتے ہوئے کہا کہ ملک میں ڈیزل کا ذخیرہ تقریبا 24 دن کے لیے کافی ہے،پیٹرول کی سپلائی بھی تسلی بخش سطح پر برقرار ہے، ایک آئل کارگو کراچی پہنچ چکا، دوسرا جلد پہنچنے والا ہے۔ وزارت خزانہ نے کہا کہ مزید آئل شپمنٹس راستےمیں ہیں ،مارچ اوراپریل کیلئےانتظام جاری ہے۔
اجلاس کوبریفنگ میں بتایا گیا کہ عالمی منڈی میں تیل کی قیمتوں میں اضافہ اور دباؤ برقرار ہے، مہنگےتیل کی وجہ سے درآمدی اخراجات بڑھ گئےہیں۔ وزارت خزانہ نے کہا کہ ایل سیز کے بڑھتے سائزکی وجہ سےدرآمد میں مشکلات ہیں۔
وزیرخزانہ نے بینکس،درآمد کنندگان کے درمیان بہتر تعاون کی ہدایت کر دی جبکہ اسٹیٹ بینک اور بینکوں کو سہولت دینے کی ہدایت بھی کر دی گئی ہے ۔
اعلامیہ کے مطابق ضرورت پڑنے پر مشترکہ فنانسنگ کے آپشن پر بھی غور کیا گیا، ملک میں ایندھن کی طلب میں حالیہ دنوں میں اضافہ دیکھا گیا۔
وزیرخزانہ نے ذخیرہ اندوزی روکنے کیلئےسخت نگرانی کی ہدایت کی ، وزارت پیٹرولیم نے کہا کہ عید اور فصل کی کٹائی کےدوران بھی سپلائی جاری رہےگی،اس مقصد کیلئے آئل کمپنیاں مکمل طور پر تیار ہیں۔
اجلاس میں ڈیجیٹل سسٹم کے ذریعے ایندھن کی نگرانی مزید بہتر بنانے کا فیصلہ کیا گیا اور تمام اداروں کو بروقت ڈیٹا شیئر کرنے کی ہدایت کر دی گئی۔
وزیر خزانہ نے کہا کہ حکومت متبادل ممالک سےتیل کی سپلائی بڑھانےپرکام کررہی ہے،توانائی کی سیکیورٹی مضبوط بنانے کے اقدامات جاری ہیں، عوام کوریلیف دینا اور سپلائی برقرار رکھنا اولین ترجیح ہے۔
