الیکشن کمیشن آف پاکستان ( ای سی پی ) نے غیر سرکاری تنظیم ( این جی او ) پتن کے نمائندہ کا انٹرویو اور پریس ریلیز بے بنیاد اور حقائق کے منافی قرار دے دی۔
الیکشن کمیشن کی جانب سے جاری کردہ اعلامیہ کے مطابق پتن کے نمائندہ کا انٹرویو اور پریس ریلیز بے بنیاد اور حقائق کے منافی ہے اور پتن اور اس کے عہدہ دار ملکی اداروں کو بدنام کرنے کیلئے منظم سازش کا حصہ ہیں۔
ترجمان الیکشن کمیشن کے مطابق عام انتخابات کے بعد فارم 46 ،45 اور47 کو بغیر کسی ردوبدل کے ویب سائٹ پر آویزاں کیا گیا اور یہ فارم آج تک ویب سائٹ پر موجود ہیں جبکہ فریقین نے الیکشن پٹیشنز قانون کے مطابق ٹریبونلز میں دائر کی ہیں جن کی سماعت جاری ہے اور کچھ پر فریقین کا موقف سن کر فیصلہ جات بھی کردیے گئے ہیں۔
ترجمان کا کہنا تھا کہ الیکشن میں ووٹرز کا ٹرن آوٹ الیکشن کمیشن کی سالانہ اور پوسٹ الیکشن رپورٹ میں شامل ہے اور یہ رپورٹس قانون کے مطابق شائع کی جا رہی ہیں۔
ترجمان نے کہا کہ خواتین اور غیرمسلموں کی مخصوص نشستوں پر تبصرہ کرنا مناسب نہیں ہوگا اور الیکشن کمیشن اس معاملے پر آئین اور قانون کے مطابق فیصلہ کرے گا اور کسی کے پاس بے ضابطگیوں کا مواد ہے تو متاثرہ فریقین کو مہیا کریں تا کہ وہ ٹربیونلز کے سامنے پیش کریں اور پٹیشنز پر قانون کے مطابق درست کارروائی ہوسکے۔
ترجمان کا کہنا تھا کہ پتن کو رپورٹ شائع کرنے سے قبل الیکشن کمیشن سے موقف لینا چاہیے تھا، رپورٹ ادارے کا موقف جانے بغیر شائع کی گئی جس سے ظاہر ہوتا ہے کہ یہ سراسر بے بنیاد اور من گھڑت پروپیگنڈے کا تسلسل ہے۔
ترجمان کا مزید کہنا تھا کہ الیکشن کمیشن اس قسم کے ہتھکنڈوں سے دباؤ میں نہیں آئے گا اور آئین و قانون کے مطابق اپنے فرائض سرانجام دیتا رہے گا۔
