بالی ووڈ کی معروف ڈانسنگ گرل اور اداکارہ، مراکش سے تعلق رکھنے والی نورا فتیحی اپنی سالگرہ سے ایک دن قبل عجیب و غریب جھوٹی خبر کا شکار بن گئیں۔
بھارتی میڈیا رپورٹس کے مطابق اپنے مخصوص ڈانس اسٹیپس سے لوگوں کے دل جیتنے والی نورا فتیحی سے متعلق جھوٹی خبریں وائرل ہوئیں کہ وہ ایک حادثے کا شکار ہوکر دنیا سے رخصت ہوگئی ہیں۔
سوشل میڈیا پر جنگل کی آگ کی طرح پھیلنے والی گمراہ کن ویڈیو میں ایک خاتون کو پہاڑ کی بلندی سے نیچے گرتے ہوئے دیکھا گیا۔
وائرل ویڈیو کلپ پر ایک سوشل میڈیا صارف نے لکھا ’’بالی ووڈ کی مشہور اداکارہ نورا فتیحی کی موت بالی ووڈ کیلئے بری خبر ہے‘‘۔
بعد ازاں یہ ویڈیو سوشل میڈیا پر وائرل ہوئی تاہم ان دعوؤں میں کوئی صداقت نہیں اور بھارتی میڈیا نے نورا کے زندہ سلامت ہونے کی تصدیق کی ہے۔
بھارتی میڈیا رپورٹس میں وائرل ویڈیو کو جعلی قرار دیا گیا، اور کہا گیا بظاہر ویڈیو کلپ عوام کو گمراہ کرنے اور غیر ضروری خوف و ہراس پھیلانے کیلئے بنایا گیا ہے۔
سوشل میڈیا صارفین کی جانب سے نورا فتحی سے متعلق جھوٹی اور غلط خبریں پھیلانے والوں پر سخت تنقید کی گئی ہے۔
یاد رہے کہ یہ پہلا موقع نہیں جب کسی اسٹار کی موت سے متعلق جھوٹی خبر سوشل میڈیا کی زینت بنی ہو۔
