نصیرآباد میں پہلا ویمن پولیس اسٹیشن قائم کردیا گیا، اسٹیشن کا افتتاح آئی جی پولیس بلوچستان عبدالخالق شیخ نے کیا۔
آئی جی بلوچستان ویمن پولیس اسٹیشن نصیرآباد کا افتتاح کرنے پہنچے جہاں انہوں نے ویمن پولیس اسٹیشن کا معائنہ کیا اور ویمن پولیس اسٹیشن کی افتتاحی تقریب میں شرکت کی۔
تقریب میں انہوں نے ویمن پولیس اسٹیشن کی خواتین اہلکاروں اور عملے سے خطاب کیا اور شہداء کے لواحقین میں راشن، کمبل، چٹائیاں اور گیس سلنڈر تقسیم کئے۔
اس موقع پر انہوں نے میڈیا سے گفتگو کرتے ہوئے کہا کے نصیرآباد میں پہلا ویمن پولیس اسٹیشن قائم کردیا گیا ہے، بلوچستان میں اس طرز کے 5 پولیس اسٹیشن ہیں جہاں خواتین کے معاملات کو دیکھا جارہا ہے، خواتین جہاں دیگر شعبہ جات میں اپنا کردار ادا کررہی ہیں، وہیں پولیس میں بھی خواتین کا رجحان بڑھ رہا ہے، چاہتا ہوں خواتین پولیس فورس میں اپنا کردار ادا کریں۔
ان کا کہنا ہے کہ خواتین پولیس اہلکاروں کی تعداد انتہائی کم تھی جس کو ہم نے ایک سال میں ڈبل کردیا، مگر پھر بھی 8 فروری کے عام انتخابات میں پولنگ اسٹیشنز پر جہاں جہاں خواتین کی ضرورت پڑے گی ہم انہیں ضرور تعینات کریں گے۔
