عید کی تعطیلات کے بعد اسلام آباد میں کفایت شعاری اقدامات دوبارہ نافذ کر دیے گئے۔ ضلعی انتظامیہ نے مارکیٹوں، شاپنگ مالز، شادی ہالز اور دیگر کاروباری مراکز کے اوقات کار سے متعلق نیا نوٹیفکیشن جاری کر دیا۔
وفاقی دارالحکومت اسلام آباد میں عید کی تعطیلات ختم ہوتے ہی کفایت شعاری اقدامات کا دوبارہ نفاذ کر دیا گیا ہے۔ ضلعی انتظامیہ کی جانب سے جاری نوٹیفکیشن کے مطابق شہر بھر کی مارکیٹیں اور شاپنگ مالز رات 8 بجے بند کیے جائیں گے۔
نوٹیفکیشن کے مطابق ان اوقات کار کا اطلاق یکم جون 2026 سے تاحکمِ ثانی نافذ العمل رہے گا۔ تاہم میڈیکل اسٹورز اور اسپتالوں کو ان پابندیوں سے مستثنیٰ قرار دیا گیا ہے۔
ضلعی انتظامیہ کے مطابق پیٹرول پمپس اور سی این جی اسٹیشنز معمول کے مطابق کھلے رہیں گے جبکہ ہوٹل، تندور، کریانہ اسٹورز اور بیکریاں رات دس بجے تک کاروبار جاری رکھ سکیں گی۔
نوٹیفکیشن میں شادی ہالز اور مارکیز کو بھی رات 10 بجے تک بند کرنے کی ہدایت کی گئی ہے۔ انتظامیہ کا کہنا ہے کہ توانائی کے مؤثر استعمال اور کفایت شعاری اقدامات کے تسلسل کے لیے یہ فیصلے کیے گئے ہیں۔
قبل ازیں عید ختم ہونے کے بعد پنجاب میں بھی مارکیٹوں پر وقت کی پابندی آج سے دوبارہ نافذ العمل ہوگا۔ دو جون سے مارکیٹ اور ریسٹورنٹ پرانے اوقات کار کے مطابق کھلیں گے، وقت کی پابندی سے استثنیٰ صرف یکم جون تک دیا گیا تھا۔
