اڈیالہ جیل سے علاج کی غرض سے بینظیر بھٹو اسپتال منتقل کیا گیا ایک سزایافتہ قیدی اسپتال سے فرار ہو گیا، جس کے بعد واقعے کا مقدمہ تھانہ وارث خان میں درج کر لیا گیا۔
پولیس کے مطابق فرار ہونے والے ملزم کی شناخت جمیل کے نام سے ہوئی ہے، جو منشیات برآمدگی کے مقدمے میں گرفتار اور عدالت سے سزایافتہ تھا۔
مقدمے کے متن کے مطابق ڈیوٹی پر تعینات پولیس اے ایس آئی عمران احمد اور کانسٹیبل قمر علی کو بھی نامزد کیا گیا ہے۔
ایف آئی آر کے مطابق فرار ملزم کو اس کا بیٹا عدنان اور ایک نامعلوم شخص وہیل چیئر پر وارڈ سے باہر لے کر گئے۔ بعد ازاں زیر علاج ملزم کو گاڑی میں بٹھا کر موقع سے فرار کرا دیا گیا۔
پولیس کے مطابق ملزم کے خلاف گزشتہ سال کاؤنٹر نارکوٹکس فورس پنجاب میں منشیات اسمگلنگ کا مقدمہ درج کیا گیا تھا۔
عدالت نے منشیات اسمگلنگ کا جرم ثابت ہونے پر ملزم جمیل کو 9 سال قید کی سزا سنائی تھی، جبکہ ایک لاکھ 80 ہزار روپے جرمانہ بھی عائد کیا گیا تھا۔
پولیس کا کہنا ہے کہ فرار ملزم اور اس کی مدد کرنے والے افراد کی گرفتاری کیلئے کارروائی شروع کر دی گئی ہے، جبکہ واقعے میں غفلت یا معاونت کے پہلوؤں کا بھی جائزہ لیا جا رہا ہے۔
