کپتان قومی کرکٹ ٹیم سلمان آغا کا کہنا ہے کہ بھارت کیخلاف میچ میں بولنگ اور بیٹنگ لائن نے مایوس کیا۔
بھارت سے شکست کے بعد سلمان آغا نے کہا کہ بیٹنگ میں اچھی شروعات نہیں ہوئی، پچھلے چھ ماہ سے اسپنرز کی پرفارمنس اچھی رہی، بولنگ اور بیٹنگ لائن نے مایوس کیا۔ سپر8 میں رسائی کیلئے نمیبیا کیخلاف میچ جیتنا ہوگا۔
دوسری جانب قومی کرکٹ ٹیم کے ہیڈ کوچ مائیک ہیسن کا کہنا ہے کہ ٹی 20 ورلڈ کپ کے گروپ میچ میں بھارتی ٹیم نے ہم کو آؤٹ کلاس کردیا۔
بھارت کے ہاتھوں شکست کے بعد پریس کانفرنس کرتے ہوئے قومی ہیڈ کوچ مائیک ہیسن کا کہنا تھا کہ دوسری اننگز میں گیند زیادہ اسکڈ ہوئی، اشان کشن ہم سے میچ لے گئے اور بھارت نے بیس پچیس رنز زیادہ بنائے۔
ہیڈ کوچ کا کہنا تھا کہ عثمان طارق کا یہی رول ہے اور اس کو صحیح وقت پر لائے تاہم ہم نے بیٹنگ اچھی نہیں کی اور اشان کشن نے ہمارے اسپنر پر دباؤ ڈالا جبکہ بھارت نے ہم کو آوٹ کلاس کردیا۔
ان کا کہنا تھا کہ ڈریسنگ روم میں سب مایوس ہیں ، پہلے بولنگ کا کرنے کا فیصلہ درست تھا، پہلی اننگز میں گیند زیادہ اسپن ہوئی، ٹورنامنٹ میں آگے جانا ہے تو بہتر کھیلنا ہوگا۔ انہوں نے کہا کہ ہماری ابتدائی وکٹیں جلدی گر گئیں ، ہم دو مہینے سے اچھا کھیل رہے تھے، لیکن آج پیچھے چلے گئے۔
انہوں نے بتایا کہ کپتان سلمان آغا پہلا اوور کریں گے اسکا پلان تین دن پہلے بنایا تھا اور سلمان پہلا اوور کرنے کی پریکٹس کر رہے تھے، تیار بھی تھے۔
