گورنر خیبرپختونخوا فیصل کریم کنڈی نے کہاہے کہ پاکستان میں غربت کے خاتمے کیلئے مؤثر حکمت عملی اپنانا ہوگی، سی ایس آر سمٹ سے خطاب کرتے ہوئے انہوں نے کہا کہ دیہی علاقوں میں شہری علاقوں کے مقابلے میں غربت زیادہ ہے ، بے نظیر انکم سپورٹ پروگرام سے ایک کروڑ خواتین مستفید ہو رہی ہیں۔
فیصل کریم کنڈی نے کہا کہ اصل کامیابی اس دن ہوگی جب مستحقین کی تعداد کم ہو اور خواتین خود اپنے پاؤں پر کھڑی ہوں۔ مشکل حالات میں کاروبار کرنے والوں کو خراج تحسین پیش کرتا ہوں۔ انکا کہنا تھاکہ غریت کا مقابلہ کرنے کے لئے حکمت عملی کی ضرورت ہے۔
دوسری جانب وفاقی وزیر سرمایہ کاری بورڈ قیصر احمد شیخ نے کہا کہ قوم کا مستقبل بہتر بنانے کیلئے تعلیم کو ترجیح دینا ضروری ہے۔ ایس ایم ای سیکٹر معیشت میں ساٹھ فیصد حصہ رکھتا ہے مگر اسے قرضوں میں صرف چھ فیصد حصہ ملتا ہے، جس میں اضافہ کرنا ہوگا۔
وفاقی وزیر نے چین کی مثال دیتے ہوئے کہا کہ وہاں تعلیم اور ترقی کے ذریعے کروڑوں افراد کو غربت سے نکالا گیا، جبکہ پاکستان میں آج بھی ڈھائی کروڑ بچے اسکول سے باہر ہیں۔ انکا کہنا تھاکہ پچھلی حکومت نے ساڑھے تین ارب روپے کا قرضہ دیا۔اگریہی رقم تعلیم پر خرچ ہوتی تو تعلیمی نظام میں بہتری آجاتی۔
