کراچی میں متروکہ وقف املاک بورڈ کی ملکیتی جائیدادوں سے متعلق مبینہ بے ضابطگیوں کی تحقیقات کے سلسلے میں ایف آئی اے نے کارروائی کرتے ہوئے کے ایم سی ہیڈ آفس پر چھاپہ مارا۔ ذرائع کے مطابق عمارتوں کے ریکارڈ میں گڑبڑ کی شکایات پر اینٹی کرپشن سرکل کی ٹیم نے یہ کارروائی کی۔
ذرائع کا کہنا ہے کہ ایف آئی اے کی ٹیم سب سے پہلے میونسپل کمشنر سمیرا حسین کے دفتر پہنچی، جس کے بعد ٹیم ایم سی افسران کے ہمراہ دوسری منزل پر قائم لینڈ ریکارڈ کے ریکارڈ روم میں داخل ہوئی۔ ریکارڈ روم پر تالے لگے ہونے پر ایف آئی اے افسران نے برہمی کا اظہار کیا اور بعد ازاں تالا توڑ کر ریکارڈ اپنی تحویل میں لینا شروع کر دیا۔
دوسری جانب ذرائع کے مطابق اسٹاک ایکسچینج بلڈنگ سے متعلق گواہ بننے والے کے ایم سی کے ایک ملازم کو ملازمت سے فارغ کر دیا گیا ہے۔
متروکہ وقف املاک بورڈ کی جائیدادوں کی نشاندہی اور چھان بین کے لیے ایف آئی اے نے دو اسسٹنٹ ڈائریکٹرز کی سربراہی میں ٹیمیں بھی تشکیل دے دی ہیں۔
