پاکستان اور گھانا کے درمیان پہلی دو طرفہ سیاسی مشاورت کے دوران ہی مفاہمت کی دو یادداشتوں پر دستخط کردیئے گئے۔ طے پایا دو طرفہ سیاسی مشاورت کا اگلا دور اگلے سال اسلام آباد میں ہو گا۔
ترجمان دفتر خارجہ کے مطابق پاکستانی وفد کی قیادت ایڈیشنل سیکرٹری خارجہ حمید اصغر خان نے کی جبکہ گھانا کی جانب سے چیف ڈائریکٹر وزارت خارجہ سفیر خدیجہ ادریسو نے وفد کی سربراہی کی۔ مشاورت کے دوران سیاسی مشاورت اوردونوں ممالک کے فارن سروس تربیتی اداروں کے حوالے سے الگ الگ ایم او یو پر دستخط کئے گئے۔
اعلامیے کے مطابق دونوں ممالک نے باہمی تعلقات کو مزید مستحکم کرنے کے عزم کا اعادہ کیا اور سیاسی، اقتصادی، دفاعی، سیاحت، ثقافت، صحت، تعلیم، انفارمیشن ٹیکنالوجی اور دیگر شعبوں میں تعاون بڑھانے پر اتفاق کیا۔
