وزیراعظم شہبازشریف بحرین کے 2 روزہ سرکاری دورے پر ہیں جہاں ان کی بحرین کے بادشاہ حمد عیسیٰ الخلیفہ سے ملاقات ہوئی جس دوران مضبوط اور تاریخی شراکت داری پر تبادلہ خیال کیا گیا ، وزیراعظم شہبازشریف نے شاندار استقبال پر حمد بن عیسیٰ الخلیفہ کا شکریہ ادا کیا اور دیرینہ خیر سگالی کو سراہا ۔
تفصیلات کے مطابق ملاقات کےدوران بحرین کے بادشاہ حمد بن عیسیٰ الخلیفہ نے وزیراعظم شہباز شریف کو آرڈر آف بحرین پیش کیا اور کہا کہ بحرین کو یہ اعزاز حاصل ہے کہ قائداعظم نے بحرین کی قانونی نمائندگی کی، ہمارے ریکارڈ کی دستاویزات کے مطابق محمدعلی جناح بحرین کے وکیل رہے۔
ملاقات کے دوران دونوں اطراف نے دوطرفہ تعلقات میں حوصلہ افزا رفتار کا جائزہ لیا گیا جبکہ سیاسی،اقتصادی،دفاعی اور ثقافتی شعبوں میں تعاون کو مزید بڑھانے پر اتفاق کیا گیا ۔ وزیراعظم نے مشترکہ ایمان اور باہمی احترام پر مبنی دوطرفہ تعلقات کے مزید فروغ کے عزم کا اعادہ کیا ۔
وزیراعظم نے اسلام آباد میں کنگ حمد یونیورسٹی کے قیام میں تعاون پر بحرین کی قیادت کا شکریہ ادا کیا، تجارت اور سرمایہ کاری کو وسعت دینے کی پاکستان کی خواہش کو بھی اجاگر کیا۔
شہبازشریف نے کہا کہ پاکستان جی سی سی آزاد تجارتی معاہدے کے ساتھ دوطرفہ تجارت کو مزید فروغ دینے کیلئے تیار ہے۔ وزیراعظم نے بحرینی سرمایہ کاروں کو سرمایہ کاری کے مزید مواقع تلاش کرنے کی دعوت بھی دی ۔ شہبازشریف نے بحرین میں ڈیڑھ لاکھ سے زائد پاکستانیوں کی مہمان نوازی کی بھی تعریف کی۔
وزیراعظم شہباز شریف نے پاکستانی قیدیوں کی وطن واپسی پر حمد بن عیسیٰ الخلیفہ کا شکریہ ادا کیا، ملاقات کے دوران دونوں رہنماؤں نے دیرینہ دفاعی شراکت داری کی اہمیت کا اعادہ کیا، تکنیکی تربیت، لاجسٹکس،افرادی قوت اور دفاعی پیداوار میں تعاون مضبوط بنانے پر اتفاق کیا جبکہ غزہ کی حالیہ پیشرفت پرتبادلہ خیال کیا اور غزہ میں امن واستحکام انتہائی خوش قرار دیا ۔ ملاقات میں عزم ظاہر کیا گیا کہ یہ دورہ پائیدار دوستی اور تعاون کو مزید مستحکم کرےگا۔
