جوائنٹ اسٹاف ہیڈکوارٹرز میں جنرل ساحر شمشاد مرزا کے اعزاز میں الوداعی تقریب کا انعقاد کیا گیا جس میں سکبدوش چیئرمین جوائنٹ چیفس آف اسٹاف کمیٹی نے کہا کہ بدلتے ہوئے جیو اسٹریٹجک ماحول میں مضبوط قومی دفاع، قومی سلامتی کی بنیادی ضرورت ہے ۔
جوائنٹ اسٹاف ہیڈکوارٹرز میں جنرل ساحر شمشاد مرزا کو تینوں مسلح افواج کے دستے نے گارڈ آف آنربھی پیش کیا ۔ تقریب میں سابق چیئرمین جوائنٹ چیفس آف اسٹاف کمیٹی اور مسلح افواج کے سینئر افسران بھی شریک ہوئے ۔ شرکا سے خطاب میں جنرل ساحر شمشاد مرزا نے فرض شناسی، پیشہ ورانہ مہارت کےساتھ ذمہ داریاں ادا کرنے کی طاقت عطا فرمانے پر اللہ تعالیٰ کا شکر ادا کیا ۔
جنرل ساحر شمشاد مرزا نے مادر وطن کے تحفظ کیلئے پاک افواج کی لازوال قربانیوں کو خراج عقیدت اور شہداء و غازیوں کے اہل خانہ کو سلام بھی پیش کیا اور کہا پاکستان کا دفاع ناقابل تسخیر ہے،اور ہمارے بہادر افسران و جوان ہر لمحہ اس دفاع کو مزید مضبوط بنانے کیلئے تیار و مستعد ہیں ۔
