بھارتی کرکٹ بورڈ (بی سی سی آئی) نے روہت شرما کی جگہ شبمن گل کو ون ڈے ٹیم کا نیا کپتان مقرر کر دیا ہے اور شبمن گل جو پہلے ٹیسٹ ٹیم کی قیادت کر رہے ہیں اب ون ڈے ٹیم کی بھی کپتانی کریں گے۔
روہت شرما اور ویرات کوہلی فٹنس ٹیسٹ کلیئر کرنے کے بعد ون ڈے اسکواڈ کا حصہ ہیں اور اب یہ دونوں کھلاڑی نوجوان کپتان شبمن گل کی قیادت میں آسٹریلیا کے خلاف مقابلہ کرتے دکھائی دیں گے۔
بھارتی ٹیم کے چیف سلیکٹر اجیت آگروکر نے اس تبدیلی کے حوالے سے کہا کہ تینوں فارمیٹس کے لیے تین مختلف کپتانوں کا ہونا عملی طور پر ممکن نہیں اس لیے ٹیم کی منصوبہ بندی کے تحت مختلف کپتان مقرر کیے گئے ہیں۔
ان کا کہنا تھا کہ فی الحال ٹیم کی توجہ ٹی ٹوئنٹی ورلڈ کپ پر مرکوز ہے جبکہ ون ڈے ورلڈ کپ کے لیے بھی منصوبہ بندی کی جارہی ہے تاکہ نئے کپتان کو زیادہ وقت دیا جا سکے۔
روہت شرما کو کپتانی سے ہٹانے کے فیصلے کے بارے میں انہوں نے کہا روہت کی قیادت میں بھارتی ٹیم نے چیمپئنز ٹرافی جیتی لہٰذا یہ فیصلہ مشکل تھا لیکن ٹیم کے مفاد میں ضروری تھا۔
انہوں نے مزید بتایا کہ روہت کو اس فیصلے سے آگاہ کیا گیا تھا اور شبمن گل کے ساتھ وہ ون ڈے میچوں میں اوپننگ کرتے رہیں گے۔
بھارتی میڈیا رپورٹس کے مطابق بی سی سی آئی کے ذرائع کے مطابق سلیکٹرز اور ٹیم مینجمنٹ اس بات سے خوفزدہ تھے کہ اگر روہت شرما کپتانی جاری رکھتے تو وہ اپنی فلسفانہ قیادت کے تحت ٹیم کو چلائیں گے جس سے ٹیم کلچر پر منفی اثرات مرتب ہو سکتے تھے۔
رپورٹ میں کہا گیا ہے کہ روہت جیسے کرکٹر کی قیادت میں ڈریسنگ روم پر ان کے نظریات کی حکمرانی ہوتی ہے جو ٹیم کلچر کو نقصان پہنچا سکتی ہے۔
