راولپنڈی میں کام کے بہانے ساتھ لے کر مزدور کا گردہ نکالنے کا انکشاف ہوا ہے۔ واقعہ تھانہ چکلالہ راولپنڈی کی حدود میں دو سال قبل پیش آیا۔ پولیس نے مقدمہ درج کرکے ملزمان کی تلاش شروع کردی ہے۔
پولیس کے مطابق مقدمہ متاثرہ مزدور زین علی کی درخواست پر درج کیا گیا۔ مقدمے میں جمشید عرف ببلی، عرفان، امین،نامعلوم ڈاکٹر، لیڈی ڈاکٹر اور طبی عملے کو ملزم نامزد کیا گیا ہے۔
مقدمے کے متن کے مطابق ملزمان مزدور کو کام کے بہانے گاڑی میں ساتھ لے گئے، جہاں اسے جوس پلا کر بے ہوش کیا گیا اور آپریشن کے ذریعے بائیں جانب سے گردہ نکال لیا گیا۔ زین علی کے مطابق پانچ روز بعد ہوش آیا تو وہ امین کے گھر موجود تھا، جس نے دوا لینے کا کہتے ہوئے بتایا کہ کام کے دوران گرنے کی وجہ سے مجھے پیٹ میں بائیں جانب درد ہے۔
بعدازاں والدین کو بلایا گیا جو اسے لاہور لے گئے۔لاہور میں ڈاکٹر نے معائنے کے دوران بتایا کہ اس کا گردہ نکال لیا گیا ہے۔ متاثرہ مزدور کے مطابق مکمل علاج کروانے کے بعد قانونی کارروائی کا فیصلہ کیا۔
عدالتی حکم پرطبی معائنہ بینظیر بھٹو اسپتال میں کروایا گیا، جہاں رپورٹ میں گردہ نکالے جانے کی تصدیق ہوئی،پولیس نے مقدمہ درج کر کے تحقیقات شروع کر دی ہیں۔
