محکمہ موسمیات کے ٹروپیکل سائیکلون وارننگ سینٹر کی جانب سے دسواں الرٹ جاری کردیا۔
محکمہ موسمیات کے مطابق شدید سمندری طوفان شکتی شمال مغربی بحیرہ عرب میں موجود ہے۔ طوفان گزشتہ 6 گھنٹوں کے دوران مغرب، جنوب مغرب کی سمت بڑھا اور اس وقت کراچی سے تقریباً 800 کلومیٹر جنوب مغرب میں واقع ہے۔
محکمہ موسمیات کا کہنا ہے کہ طوفان آئندہ 12 گھنٹوں میں جنوب مغرب کی جانب بڑھنے کے بعد مشرق کی طرف مڑ جائے گا اور رفتہ رفتہ کمزور ہو کر سائیکلونک اسٹورم میں تبدیل ہو جائے گا۔
طوفان کے زیراثر سندھ اور بلوچستان کے ساحلی علاقوں میں ہلکی بارش کا امکان ظاہر کیا گیا ہے جبکہ سمندر میں طغیانی اور تیز ہواؤں کے جھکڑ چلنے کی پیش گوئی کی گئی ہے۔ ہواؤں کی رفتار 40 سے 50 کلومیٹر فی گھنٹہ تک جبکہ جھکڑوں کی شدت 55 کلومیٹر فی گھنٹہ تک پہنچ سکتی ہے۔
طوفان کے مرکز کے گرد ہواؤں کی رفتار 110 سے 120 کلو میٹر فی گھنٹہ تک ریکارڈ کی گئی۔ محکمہ موسمیات نے ماہی گیروں کو گہرے سمندر میں نہ جانے کی ہدایت کی ہے۔
