پاکستان اور افغانستان کے درمیان استنبول میں ہونے والے مذاکرات میں ڈیڈلاک آگیا ، وفاقی وزیر اطلاعات عطا تارڑ کا کہنا ہے کہ پاکستان مذاکرات میں ثالثی پر ترکیہ اور قطر کا شکریہ ادا کرتا ہے ، پاکستان اپنے عوام اور خودمختاری کے تحفظ کے لیے تمام ضروری اقدامات جاری رکھے گا۔
ترکیہ میں پاک افغان مذاکرات کے حوالے سے بیان میں وزیر اطلاعات عطا تارڑ نے واضح کیا کہ پاکستان اپنے اصولی موقف پر قائم ہے کہ افغانستان کی سرزمین سے ہونے والی دہشت گردی پر قابو پانے کی ذمہ داری افغانستان پر عائد ہوتی ہے۔ افغان طالبان دوحا امن معاہدے دو ہزار اکیس کے مطابق اپنے بین الاقوامی،علاقائی اور دوطرفہ وعدوں کی تکمیل میں اب تک ناکام رہا ہے ۔
وزیر اطلاعات نے کہا پاکستان اس بات کا اعادہ کرتا ہے کہ وہ افغان عوام سے خیر سگالی کا جذبہ رکھتا ہے اور ان کے لیے ایک پر امن مستقبل کا خواہش مند ہے لیکن طالبان رجیم کے ایسے اقدامات کی حمایت نہیں کی جائے گی جو افغان عوام یا پڑوسی ممالک کے مفاد میں نہ ہوں۔
