ریٹائرڈ ججز کی سیکیورٹی سے متعلق مراسلے پر سپریم کورٹ نے وضاحات جاری کر دی ہے جس میں کہا کہ چیف جسٹس پاکستان سمیت ججز کی سیکیورٹی کو ریگولیٹ کیا گیا ہے ۔
ترجمان سپریم کورٹ کا کہنا ہے کہ عوامی وسائل کے دانشمندانہ استعمال کے عزم سے چیف جسٹس کی سیکیورٹی معقول بنائی گئی ، پروٹوکول میں سرکاری گاڑیوں کی تعداد آٹھ سے کم کر کے دو کر دی ہے ۔ دیگر ججوں کیلئے حفاظتی نظام کو بھی مناسب طریقے سے منظم کیا گیا ۔ ریٹائرڈ ججز کی سیکیورٹی کو بھی مروجہ قوانین،پروٹوکولز اور استحقاق کے مطابق ریگولیٹ کیا ۔
صدارتی حکم ریٹائرڈ ججوں کو تاحیات سیکیورٹی فراہم کرتا ہے، مسلسل سیکیورٹی خدشات مدنظر رکھتے ہوئے سرکلر جاری کیا گیا تھا۔ یہ سیکیورٹی کسی غیر معمولی فائدے، اضافی رعایت یا مراعات میں شامل نہیں ، سرکلر اس لئے جاری کیا گیا تاکہ ضرورت سے زیادہ فورس کی تعیناتی نہ ہو جبکہ سپریم کورٹ ، وزارت داخلہ اور صوبائی حکام کے درمیان ہم آہنگی یقینی بنائی جا سکے ۔
