اسلام آباد اور راولپنڈی میں تیز ہواؤں کے ساتھ بوندا باندی سے موسم خوشگوار ہو گیا، محکمہ موسمیات نے آج رات مزید بارش اور چند مقامات پر ژالہ باری کی پیشگوئی کر دی۔
جڑواں شہروں کے مختلف علاقوں میں تیز ہواؤں کے ساتھ بوندا باندی سے موسم خوشگوار ہو گیا۔ محکمہ موسمیات کے مطابق رات کے اوقات میں اسلام آباد، راولپنڈی، ٹیکسلا اور میانوالی میں مزید بارش کا امکان ہے۔ جبکہ بعض مقامات پر ژالہ باری بھی ہو سکتی ہے۔ آج سے بارہ مارچ کے دوران ملک کے بالائی علاقوں میں گرج چمک کے ساتھ بارش متوقع ہے۔ خیبر پختونخوا، گلگت بلتستان اور آزاد کشمیر کے مختلف علاقوں میں بھی بارش کی پیشگوئی کی گئی ہے۔ محکمہ موسمیات کے مطابق بارش کے باعث بالائی علاقوں میں درجہ حرارت پانچ ڈگری سینٹی گریڈ تک گر سکتا ہے۔
