ڈسٹرکٹ اینڈ سیشن کورٹ اسلام آباد نے بانی پی ٹی آئی اور بشریٰ بی بی کی مختلف مقدمات میں عبوری ضمانت میں توسیع کر دی ۔ پولیس کو متعلقہ مقدمات میں دونوں کی گرفتاری سے بھی روک دیا۔
ایڈیشنل سیشن جج محمد افضل مجوکہ نےبانی پی ٹی آئی کی 6 اور بشری بی بی کی ایک کیس میں عبوری ضمانت میں توسیع کر دی ہے۔ بانی پی ٹی آئی کی 9 مئی ، اقدام قتل اور احتجاج کے مقدمات میں ضمانت میں 7 اکتوبر تک جبکہ بشریٰ بی بی کی توشہ خانہ جعلی رسیدوں کے مقدمہ میں ضمانت میں توسیع کی گئی ہے۔
بشریٰ بی بی کی دیگر ضمانت کی درخواستوں پر فیصلہ آج بھی نہ سنایا جا سکا ۔ بانی پی ٹی آئی کی درخواستوں پر دلائل بھی مکمل نہیں ہو سکے ۔عدالت کی جانب سے کہا گیا ہے کہ بانی پی ٹی آئی اور بشری بی بی کی ضمانت کی درخواستوں پر اکٹھا فیصلہ سنایا جائے گا ۔ بانی پی ٹی آئی کیخلاف ترنول ، کراچی کمپنی ، کوہسار اور دیگر تھانوں میں مقدمات درج ہیں ۔
