عالمی مارکیٹ میں تیل کی قیمتیں مستحکم کرنے کےلیے امریکا نے 30 دن کے لیے ایرانی تیل پر پابندیاں ختم کردیں۔ صرف سمندر میں پہلے سے موجود تیل کی ترسیل اور فروخت کی اجازت ہوگی۔
غیر ملکی خبر ایجنسی کے مطابق امریکا نے ایران سے تیل کی درآمد پر عائد پابندیاں 30 دن کیلئے ہٹا دیں، بحری جہازوں پر ذخیرہ شدہ ایرانی تیل کی فروخت اور ترسیل کی اجازت دیدی، امریکی وزارت خزانہ نے عالمی مارکیٹ میں ایرانی تیل جاری کرنے کا اعلان کیا۔
امریکی سیکرٹری خزانہ کا کہنا ہے کہ ایرانی تیل کی فروخت کیلئے قلیل مدتی اجازت نامہ جاری کر دیا گیا، تقریباً 140 ملین بیرل تیل عالمی مارکیٹ میں شامل کیا جائے گا، ایران کی وجہ سے سپلائی پر عارضی دباؤ کو دور کرنے میں مدد ملے گی۔
امریکی سیکرٹری خزانہ کا مزید کہنا ہے کہ اقدام کا مقصد عالمی سپلائی اور قیمتوں کا استحکام ہے، ٹرمپ انتظامیہ 440 ملین اضافی بیرل تیل عالمی منڈی میں لانے پر کام کر رہی ہے۔
سیکرٹری خزانہ نے مزید بتایا کہ امریکی صدر ڈونلڈ ٹرمپ کے ایجنڈے نے امریکی تیل و گیس کی پیداوار ریکارڈ سطح پر پہنچا دی۔
