آپریشن بنیان مرصوص میں بھارت کیخلاف شاندار فتح کی یاد میں ’’معرکہ حق ‘‘ قومی یادگار کی تعمیر اسلام آباد میں شروع کردی گئی ہے۔
وفاقی دارالحکومت کے سیکٹر ایچ ایٹ میں یادگار ایک پارک میں تعمیر کی جا رہی ہے، یادگار کے ڈیزائن اور تعمیر کیلئے فرنٹیئر ورکس آرگنائزیشن کو ذمہ داری سونپی گئی ہے، سی ڈی اے نے یادگار کیلئے مختص کردہ جگہ ایف ڈبلیو او کو تعمیر کیلئے دیدی ہے۔
ذرائع کے مطابق اس پارک کو ایک جدید اور پرکشش عوامی مقام میں تبدیل کیا جائے گا، یادگار کا تھیم قرآن پاک کی آیت "بنیان مرصوص" سے لیا گیا ہے، آیت کا مفہوم " سیسہ پلائی ہوئی دیوار" ہے، یہ تھیم قوم کے اجتماعی غیر متزلزل عزم اور اتحاد کی علامت ہے، جو ہر طرح کے خطرات کے مقابل متحد رہنے کے جذبے کو اجاگر کرتی ہے.
منصوبے پر کام وزیراعظم شہباز شریف کی خصوصی ہدایت اورحکومتی مالی معاونت سے شروع کیا۔ وزیراعظم نے 13 اور 14 اگست کی درمیانی اس یادگار کے ڈیزائن کی نقاب کشائی کی تھی۔ یادگار کا مقصد قومی اتحاد و یکجہتی کو خراجِ تحسین پیش کرنا اور عوامی شعور، فخر اور عکاسی کا مرکز بنانا ہے۔ یادگار معرکہ حق اسلام آباد کے منظر نامے میں باوقار قومی اضافہ اور قوم کے اتحاد کا مظہر بنے گی۔
