سرکاری حج اسکیم کے تحت درخواستوں کی وصولی کا عمل مکمل ہوگیا، مزید حج درخواستوں کی وصولی روک دی گئی، ملک بھر سے اب تک ایک لاکھ 18 ہزار 60 درخواستیں موصول ہوگئیں۔
سرکاری حج اسکیم کے تحت درخواستوں کی وصولی کا عمل مکمل ہوگیا۔ ذرائع کے مطابق حج درخواستوں کی مزید وصولی روک دی گئی ہے، حج درخواستوں کی وصولی کی تاریخ میں ایک دن کی توسیع کی گئی تھی۔
رپورٹ کے مطابق ملک بھر سے ایک لاکھ 18 ہزار 60 حج درخواستیں موصول ہوگئیں، حج درخواستیں پہلے آئیے پہلے پائیے کی بنیاد پر وصول کی گئیں، 17 روز میں عازمین نے آن لائن اور منتخب بینکوں کے ذریعے درخواستیں جمع کرائیں۔
رپورٹ کے مطابق عازمین نے طویل اور مختصر دورانیے کے حج کیلئے درخواستیں جمع کرائیں، وزارت مذہبی امور نے نصف حج اخراجات پہلی قسط کے طور پر وصول کیے، حج کے باقی اخراجات دوسری قسط میں وصول کئے جائیں گے۔
حکام کے مطابق حج درخواستوں کی وصولی کا عمل ماضی کے مقابلے میں قبل از وقت مکمل کیا گیا، پہلے مرحلے میں رجسٹرڈ عازمین سے حج درخواستیں وصول کی گئی تھیں جس کے بعد غیر رجسٹرڈ افراد کیلئے حج درخواستیں جمع کرانے کا مرحلہ شروع کیا گیا تھا۔
