انسداد دہشت گردی عدالت نے 9 مئی جناح ہاؤس حملہ کیس میں عمران خان کے بھانجے اور علیمہ خان کے بیٹ شاہ ریز کا 8 روز کا جسمانی ریمانڈ منظور کرلیا۔
انسداد دہشت گردی عدالت نے پولیس کی جانب سے ریکارڈ اور دلائل پیش کیے جانے کے بعد فیصلہ محفوظ کیا تھا۔
انسداد دہشت گردی عدالت نے پولیس کی جانب سے 30 روزہ ریمانڈ کی اپیل پر فیصلہ سناتے ہوئے شاہ ریز عظیم کا 8 روزہ جسمانی ریمانڈ منظور کرلیا۔
پولیس نے ملزم سے ریکوری کیلئے جسمانی ریمانڈ کی استدعا کی تھی، جس کی سلمان اکرم راجہ نے شدید مخالفت کی۔
پاکستان تحریک انصاف کے بانی عمران خان کے بھانجے اور علیمہ خان کے بیٹے شاہ ریز عظیم کو 9 مئی جلاؤ گھیراؤ کے مقدمے میں لاہور میں ان کی رہائش گاہ سے گرفتار کرلیا گیا۔
پولیس نے شاہ ریز عظیم کی گرفتاری کی تصدیق کردی، ملزم کو 9 مئی کے مقدمے میں گرفتار کیا گیا۔
شاہ ریز عظیم کو انسداد دہشت گردی عدالت میں پیش کردیا گیا، ان کے کیس کی سماعت خصوصی عدالت کے جج منظر علی گل کررہے ہیں۔
پولیس نے مؤقف اختیار کیا کہ ملزم کو 9 مئی کے جناح ہاؤس حملہ کیس میں سپلیمنٹری بیان میں نامزد کیا گیا، ملزم کو کل گرفتار کیا، جس سے فون اور دیگر چیزیں ابھی ریکوری کرنی ہیں۔
ملزم کے وکیل سلمان اکرم راجہ نے سوال اٹھایا کہ 27 ماہ گزر گئے پولیس کو اب ان کے ملوث ہونے کا پتہ چلا؟۔ سپلیمنٹری بیان ڈیڑھ ہزار مرتبہ عدالت میں پڑھا گیا کہیں یہ نام نہیں، کل بانی کی ضمانت ہوئی اور شام کو یہ ان کے بھانجوں کو گرفتار کرنے پہنچ گئے، بدنیتی واضح نظر آرہی ہے۔
انہوں نے مزید کہا کہ شاہ ریز عظیم عالمی لیول کے اسپورٹس مین ہیں، کئی بار یہ ملک سے باہر گئے واپس آئے کبھی کسی مقدمہ میں طلب نہیں کیا گیا، 6 سے 13 مئی تک یہ چترال میں تھے، انہیں فی الفور نہ صرف رہا کیا جائے بلکہ ڈسچارج کیا جائے۔
سلمان اکرم راجہ نے دلائل دیتے ہوئے کہا کہ آپ نے آرڈر دے رکھا ہے کہ اتنی دیر بعد جب آپ ملزمان کو نامزد کرتے ہیں تو اس میں بدنیتی نظر آتی ہے، ان کی والدہ کو آپ پہلے بھی ڈسچارج کرچکے ہیں۔
پولیس نے شاہ ریز عظیم کا 30 دن کا ریمانڈ طلب کرتے کرلیا، جس پر سلمان اکرم راجہ نے کہا کہ یہ 30 دن کا ریمانڈ مانگ رہے ہیں جو زیادتی ہے۔
عدالت نے ریمارکس دیئے کہ سپلیمنٹری کی فائل آجائے میں دیکھتا ہوں۔ پولیس نے شاہ ریز کیخلاف جناح ہاؤس کیس کا ریکارڈ عدالت میں پیش کردیا۔ ڈی ایس پی لیگل کا کہنا ہے کہ ملزم شاہ ریز جناح ہاؤس کیس کے علاوہ کسی اور مقدمے میں مطلوب نہیں۔ عدالت نے ریکارڈ دیکھنے اور دلائل کے بعد فیصلہ محفوظ کرلیا۔
دوسری جانب علیمہ خان کے بیٹے شاہ ریز عظیم کی گرفتاری کی سی سی ٹی وی فوٹیج سماء کو موصول ہوگئی، جس میں 3 اہلکاروں کو ملزم کو گرفتار کرتے دیکھا جا سکتا ہے۔
