وزیراعظم شہباز شریف نے کہا کہ خیبرپختونخوا حکومت کو خیمے، ادویات، خوراک اور دیگر سامان فوری پہنچایا جائے۔ وزیراعظم کو نقصانات اور ریسکیو و ریلیف آپریشن پر پیش رفت سے آگاہ کیا گیا۔
وزیراعظم شہباز شریف نے ملک میں سیلابی صورتحال کے جائزے کیلئے ہنگامی اجلاس طلب کیا۔ اجلاس میں چیئرمین این ڈی ایم اے لیفٹیننٹ جنرل انعام حیدر ملک نے وزیراعظم کو بریفنگ دی اور بادل پھٹنے، فلش فلڈنگ سے نقصانات اور ریسکیو و ریلیف آپریشن سے آگاہ کیا۔
وزیراعظم نے کہا کہ خیبرپختونخوا حکومت کو خیمے، ادویات، خوراک اور دیگر سامان فوری پہنچایا جائے۔ امدادی سامان ترجیحی بنیادوں پر ٹرکوں کے ذریعے بھیجا جائے اور متاثرہ علاقوں میں پھنسے لوگوں و سیاحوں کو محفوظ مقامات پر منتقل کیا جائے۔
انہوں نے گورنر خیبرپختونخوا فیصل کریم کنڈی اور وزیراعلیٰ علی امین گنڈاپور سے ٹیلی فون پر گفتگو کی، بادل پھٹنے اور فلیش فلڈز سے قیمتی جانوں کے ضیاع پر افسوس کا اظہار کیا۔
وزیراعظم نے کہا کہ این ڈی ایم اے صوبائی حکومت کے ریسکیو و ریلیف آپریشن میں معاونت کرے، وفاقی حکومت ہر قسم کی مدد فراہم کرے گی۔ وفاقی حکومت ادویات، خیمے اور اشیائے خورونوش بھیج رہی ہے، اور مشکل کی اس گھڑی میں تمام تر ہمدردیاں متاثرین کے ساتھ ہیں۔
وزیراعظم نے ہدایت کی کہ ریسکیو و ریلیف آپریشن میں تعاون اور تمام وسائل بروئے کار لائے جائیں۔ این ڈی ایم اے کو خیبر پختونخوا حکومت اور پی ڈی ایم اے سے تعاون جاری رکھنے اور صوبائی حکومت سے رابطے مزید مربوط کرنے کی ہدایت دی گئی۔
