غیرت کے نام پر لڑکی کے بہیمانہ قتل کی تحقیقات میں اہم پیشرفت سامنے آئی ہے۔ سی پی او راولپنڈی خالد ہمدانی نے تصدیق کی ہے کہ ابتدائی طور پر ملزمان نے واقعے کو اغوا کا رنگ دینے کی کوشش کی، تاہم تفتیش آگے بڑھی تو اصل حقیقت کھل کر سامنے آ گئی کہ لڑکی کو قتل کر کے خاموشی سے دفنایا گیا تھا۔
تفصیلات کے مطابق سی پی او خالد ہمدانی نے کہا کہ ملزمان نے قبر کے نشان بھی مٹا دیئے،ہم ایسے معاملات کوسنجیدگی سے لیتے ہیں، پولیس نے خصوصی ٹیم بنائی قبر تلاش کر کے سیکورٹی لگائی گئی، سب سے اہم بات یہ ہے کہ مقدمہ کی مدعیت اب پولیس اور اسٹیٹ کی ہے، کچھ لوگ گرفتار ہیں مقدمہ میں شامل دفعہ کے تحت صلح نہیں ہوسکتی۔
خالد ہمدانی نے کہا کہ قبرستان کمیٹی کا چیئرمین اور گورکن گرفتار افراد میں شامل ہیں، تمام ملوث افراد کی شناخت کی جا چکی، معاملہ کی تہہ تک پہنچ چکے ہیں، یقین دلاتے ہیں کہ اس جرم میں ملوث کوئی شخص قانون سے نہیں بچ سکے گا، قبرکشائی کا قانونی عمل شروع ہوچکا،یقینی بنایا جائے گا کہ ملزمان کو سزا دلوائی جائے۔
