امریکی ریاست فلوریڈا میں 15 سالہ سمر ہینوٹ نے اپنی بہادری اور حاضر دماغی سے 10 فٹ لمبے مگرمچھ کے حملے سے خود کو بچا لیا۔
رپورٹس کے مطابق والٹن کاؤنٹی شیرف کے مطابق یہ واقعہ اس وقت پیش آیا جب مگرمچھ نے لڑکی کی ٹانگ پر حملہ کیا اور اسے پانی کے اندر کھینچ لیا۔
سمر ہینوٹ نے بتایا کہ مگرمچھ کے حملے کے باوجود انہوں نے ہمت نہیں ہاری۔
انہوں نے کہا، "میں نے مگرمچھ کے سر پر زور زور سے مکے مارے، جس سے اس نے مجھے چھوڑ دیا، لیکن چند لمحوں بعد اس نے دوبارہ پکڑ لیا۔"
لڑکی نے بتایا کہ دوسری بار جب مگرمچھ نے انہیں پانی میں کھینچا تو انہوں نے اپنی ٹانگ کو ہلانا شروع کیا اور تیزی سے تیر کر کنارے تک پہنچ گئیں۔
شیرف کے اہلکاروں کے مطابق سمر ہینوٹ کی ٹانگ پر شدید چوٹیں آئیں لیکن ان کی حالت خطرے سے باہر ہے اور انہیں فوری طور پر طبی امداد فراہم کی جا رہی ہے۔
