دنیا بھر کے بڑے ہوائی اڈوں پر کمرشل طیاروں کا مشاہدہ کیا جائے تو ایک بات فوراً نمایاں ہوتی ہے کہ زیادہ تر ایئر لائنز اپنے جہاز سفید رنگ میں رکھتی ہیں۔ تاہم Air New Zealand نے اس روایت سے ہٹتے ہوئے سیاہ رنگ کو اپنی منفرد پہچان بنا لیا۔
ایئر نیوزی لینڈ نے 2007 میں پہلی بار اپنا بوئنگ 777 مکمل سیاہ رنگ میں پیش کیا۔ اس اقدام کا مقصد ملک کی مشہور رگبی ٹیم(نیشنل رگبی یونین ٹیم ) New Zealand national rugby union team (آل بلیکس) کو خراجِ تحسین پیش کرنا تھا۔ وقت کے ساتھ یہ انداز وقتی مہم کے بجائے ایئر لائن کی مستقل برانڈ شناخت کا حصہ بن گیا۔
اس وقت ایئر لائن کے بیڑے میں 115 طیارے شامل ہیں جبکہ مزید 12 طیارے زیرِ تیاری ہیں۔ اس کا بوئنگ 777-300ER دنیا کا سب سے بڑا مکمل سیاہ رنگ کا کمرشل طیارہ سمجھا جاتا ہے۔ اگست 2022 میں Airbus A321neo کو بھی مکمل سیاہ رنگ میں متعارف کرایا گیا، جو اسٹار الائنس کا پہلا مکمل سیاہ طیارہ قرار پایا۔
ایئر لائن حکام کے مطابق سیاہ رنگ سے طیارے کی حفاظت یا کارکردگی پر کوئی منفی اثر نہیں پڑتا۔ ان کا کہنا ہے کہ جہاز کے رنگ کا بنیادی مقصد بیرونی سطح کو تحفظ فراہم کرنا ہوتا ہے اور عملی طور پر سفید اور سیاہ طیاروں کی کارکردگی میں کوئی نمایاں فرق سامنے نہیں آیا۔
ایئر نیوزی لینڈ کے لیے سیاہ رنگ محض ایک ڈیزائن نہیں بلکہ قومی تشخص کی علامت ہے۔ کمپنی کے مطابق یہ رنگ نیوزی لینڈ کی ثقافت، کھیلوں کے جذبے اور قومی فخر کی نمائندگی کرتا ہے اور عالمی سطح پر ملک کو ایک منفرد پہچان فراہم کرتا ہے۔
