وفاقی وزیر مواصلات عبدالعلیم خان نے نیشنل ہائی وے اتھارٹی (این ایچ اے) کے 5 میگا منصوبوں پر کام تیز کرنے کا ٹاسک سونپ دیا جبکہ ان منصوبوں میں ایم 6، ایم 10، کاغان، ناران اور این 25 (کراچی-کوئٹہ-چمن) شامل ہیں۔
ایک اہم اجلاس کی صدارت کرتے ہوئے وفاقی وزیر عبدالعلیم نے کہا کہ این ایچ اے 150 ارب روپے کے اپنے وسائل نئی شاہراہوں کی تعمیر پر لگائے گی۔
عبدالعلیم خان نے این ایچ اے کے ریونیو میں ریکارڈ اضافے کو خوش آئند قرار دیتے ہوئے نئے اہداف مقرر کیے۔
انہوں نے گلگت بلتستان کے تمام نئے منصوبوں کی منظوری دی اور ہدایت کی کہ آئندہ کوئی موٹروے 6 لین سے کم نہیں بنے گی۔
انہوں نے کہا کہ چاروں صوبوں کو ترجیح دی جائے گی اور منصوبوں کو ترجیحات کے مطابق مکمل کیا جائے گا۔
وفاقی وزیر نے این 25 بلوچستان کے لیے رواں سال 100 ارب روپے مختص کرنے کا اعلان کیا اور دیگر منصوبوں پر تیزی سے کام کی ہدایت دی۔
انہوں نے نئی موٹرویز کو پبلک پرائیویٹ پارٹنرشپ کے تحت تعمیر کرنے اور 90 فیصد مکمل منصوبوں کے لیے ڈیڈ لائن مقرر کرنے کی ہدایت کی جن کا افتتاح وزیراعظم کریں گے۔
اجلاس میں لاہور، قصور روڈ کے رائے ونڈ سے تعلق نہ ہونے کی بریفنگ دی گئی۔
این ایچ اے کو نیا فنانشل پلان اور منصوبوں کی فزیبلٹی رپورٹس تیار کرنے کا ٹارگٹ بھی دیا گیا۔
