غزہ میں حماس کے ایک حملے می تین اسرائیلی فوجی ہلاک اور ایک صہیونی افسر زخمی ہوگیا، اسرائیلی وزیراعظم نے واقعے کی تصدیق کردی۔ غزہ جنگ میں مارے گئے اسرائیلی فوجیوں کی تعداد 893 تک پہنچ گئی۔
اسرائیلی وزیراعظم بنجمن نیتن یاہو نے پیر کی شب کو "انتہائی مشکل" قرار دیتے ہوئے تصدیق کی کہ شمالی غزہ میں حماس کے ایک اچانک حملے میں 3 اسرائیلی فوجی ہلاک جبکہ ایک افسر شدید زخمی ہوگیا۔
نیتن یاہو نے کہا کہ پوری اسرائیلی قوم بکتر بند بریگیڈ کے ہلاک شدگان کا سوگ منارہی ہے۔
ادھر اسرائیل کے اپوزیشن رہنماء اور ڈیموکریٹک الائنس کے سربراہ یائیر گولان نے فوجیوں کی ہلاکت کا الزام نیتن یاہو پر عائد کرتے ہوئے کہا کہ یہ ایک نہ ختم ہونے والی سیاسی جنگ کے نئے نتائج ہیں، ایک بار پھر نیتن یاہو فوجیوں کو بیچ رہا ہے اور ان کے خون کو اس لیے بہنے دے رہا ہے تاکہ وہ اقتدار کی کرسی پر ایک دن اور بیٹھ سکے۔
ان واقعات سے قبل اسرائیلی فوج نے تصدیق کی تھی کہ شمالی غزہ کے علاقے جبالیہ میں حماس کے گھات میں آکر 3 فوجی مارے گئے اور ایک افسر شدید زخمی ہوگیا۔
فوجی ریڈیو نے عسکری ذرائع کے حوالے سے بتایا کہ ہلاک شدگان اور زخمی افسر کا تعلق 401 بریگیڈ سے تھا اور وہ سب اپنے ٹینک میں موجود تھے جب شدید دھماکا ہوا۔
اسرائیلی خبروں کے مطابق غزہ میں 4 مختلف فوجی کارروائیوں کے دوران مزید 3 فوجی شدید بھی زخمی ہوئے۔
رپورٹس کے مطابق حماس نے اسرائیلی افواج کو مختلف مقامات خان یونس، جبالیہ، الشجاعیہ اور التفاح میں ایک ہی وقت پر نشانہ بنایا۔
اسرائیلی براڈ کاسٹنگ اتھارٹی کے مطابق گھات لگانے کا واقعہ دوپہر کے وقت پیش آیا جب ایک میرکاوا ٹینک میں زور دار دھماکا ہوا، جس سے ٹینک میں آگ لگ گئی، آگ بجھانے میں طویل وقت لگا، جبکہ فوجی ٹینک میں پھنسے رہے۔
رپورٹ کے مطابق مارچ 2025ء سے دوبارہ شروع ہونیوالی اسرائیلی فوجی کارروائی کے بعد سے اب تک 43 اسرائیلی فوجی مارے جاچکے ہیں، جبکہ گزشتہ برس اکتوبر 2023ء میں شروع ہونیوالی غزہ جنگ کے آغاز سے اب تک ہلاک ہونیوالے اسرائیلی فوجیوں کی مجموعی تعداد 893 تک پہنچ گئی ہے۔
