امریکہ کی سینٹ کام نے 3 ایف 15 طیارے کویت میں گر کر تباہ ہونے کی تصدیق کر دی ہے اور کہا کہ امریکی طیارے فرینڈلی فائر کا نشانہ بن کر تباہ ہوئے ، طیارے آپریشن ایپک فیوری کا حصہ تھے۔
تفصیلات کے مطابق سینٹ کا م کا کہناتھا کہ طیاروں کے تمام 6 پائلٹ محفوظ رہے ہیں جنہیں ہسپتال منتقل کر دیا گیاہے، کویتی دفاعی نظام نے غلطی سے امریکی طیارے مار گرائے، ایران کی جانب سے مسلسل ڈرون اور میزائل حملے کیئے جا رہے ہیں۔
اس سے قبل کویتی وزارت دفاع نے بھی امریکہ کے طیارے گر کر تباہ ہونے کی خبروں کی تصدیق کی تھی ۔
ترجمان کویتی وزارت دفاع کا کہنا ہے کہ امریکی افواج کے ساتھ رابطے میں ہیں، طیارے گرنے کی وجوہات جاننے کی کوشش کررہے ہیں۔
الجزیرہ کے نمائندے بتایا کہ ایک خاتون اور ایک مرد پائلٹ بحفاظت زمین پر اترنے میں کامیاب رہے۔ امریکا اور کویتی حکام کی جانب سے طیارے گرنے کی تصدیق سامنے نہ آسکی۔
سوشل میڈیا پر جاری ویڈیوز میں مقامی افراد کو پائلٹوں کا سامنا کرتے ہوئے اور انہیں گاڑی میں بیٹھا کر لے جاتے ہوئے دیکھا جاسکتا ہے۔ دونوں پائلٹوں کی پیرا شوٹ کے ذریعے نیچے آتے ہوئے بھی ویڈیو سامنے آئی ہے۔
ایرانی میڈیا کے مطابق امریکی طیاروں کو ایران کے دفاعی نظام نے فضائی حدود کی خلاف ورزی پر مار گرایا۔ طیاروں کا ملبہ کویت کی حدود میں جا کر گرا۔ ابھی تک امریکی حکام کی جانب سے نقصانات کی تصدیق نہیں ہوئی۔
