پاکستان تحریک انصاف ( پی ٹی آئی ) کے سیکرٹری جنرل سلمان اکرم راجا نے کہا ہے کہ احتجاجی تحریک کے حوالے سے 90 روز کی بات وزیر اعلیٰ خیبر پختونخوا علی امین گنڈا پور کی اپنی بات ہے اور پارٹی کا فیصلہ نہیں ہے۔
یاد رہے کہ اتوار کو لاہور میں پریس کانفرنس کے دوران وزیراعلیٰ خیبرپختونخوا علی امین گنڈاپور نے 90 روز کی تحریک کا اعلان کرتے ہوئے کہا تھا کہ ہم اس تحریک میں آر یا پار کریں گے۔
علی امین کا کہنا تھا کہ حکومت میں رہیں یا نا رہیں ہمیں اس سے فرق نہیں پڑتا لیکن ہم ملک کے کونے کونے میں جائیں گے اور عوام کو متحرک کریں گے۔
علی امین کے بیان پر ردعمل دیتے ہوئے پی ٹی آئی پنجاب کی صدر عالیہ حمزہ نے سوالات اٹھائے کہ ’’ وزیراعظم خان ( بانی پی ٹی آئی ) کی رہائی کے لیے کس لائحہ عمل کا کل یا آج اعلان ہوا ہے؟، تحریک کہاں سے اور کیسے چلے گی؟، 5 اگست کے مقابلے میں 90 دن کاپلان کہاں سے آیا ہے؟ ‘‘۔
لازمی پڑھیں۔ ’ 5 اگست کے مقابلے 90 دن کا پلان کہاں سے آیا؟ ‘ ، پی ٹی آئی قیادت کے مابین اختلافات سامنے آگئے
سماء کے پروگرام ’ ندیم ملک لائیو ‘ میں اس حوالے سے گفتگو کرتے ہوئے پی ٹی آئی کے سیکرٹری جنرل سلمان اکرم راجا نے کہا کہ 90 دن کی بات علی امین گنڈاپور کی اپنی بات ہے یہ پارٹی کا فیصلہ نہیں، ہم اپنی راہ پر چلتے رہیں گے، بانی پی ٹی آئی نے تحریک کو 5 اگست کے عروج سے جوڑا ہے۔
پی ٹی آئی سیکرٹری جنرل کا کہنا تھا کہ ہم عوام کو آواز کو دے رہے ہیں اور عوام ایک نظریے کے ساتھ جڑ چکے ہیں۔
سلمان اکرم راجا کا کہنا تھا کہ 50 کی دہائی سے جو مسلط ہے پاکستان اسی گرداب میں پھنسا ہوا ہے، ہمیں عوام کو پکارنا ہوگا، ہم آپس میں لڑتے ہیں ، مقصد بڑا ہے، ہم تاریخی عمل سے گزر رہے ہیں اور آئین کیلئے جدوجہد کر رہے ہیں۔
انہوں نے کہا کہ ہم تاریک دور سے گزر رہے ہیں اور عدالتوں سے انصاف کی توقع بے سود ہے جبکہ پورے نظام کو آلہ جرم بنا دیا گیا ہے، عوام کو نکلنا چاہیے۔
ان کا کہنا تھا کہ بانی پی ٹی آئی کے بیٹوں کو پاکستان آنا چاہیے اور وہ کبھی بھی آسکتے ہیں، والد کیلئے جدوجہد کرنا ان کا حق ہے۔
انہوں نے مزید کہا کہ پاکستان کو آگے لے جانے کیلئے بانی پی ٹی آئی کے نظریے سے جڑے رہنا ہے۔
