ایشین کرکٹ کونسل کے سالانہ اجلاس کی مخالفت میں بھارت کھل کر سامنے آنے لگا ہے اور بنگلادیش کے دارالحکومت ڈھاکا کو اجلاس کے وینیو کے طور پر منتخب کیے جانے پر بھارتی بورڈ اور حکومت نے رکن ممالک پر دباؤ ڈالنا شروع کر دیاہے ۔
تفصیلات کے مطابق بھارتی حکومت اور بھارتی بورڈ نے اے سی سی کے سالانہ اجلاس میں شرکت نہ کرنے کے لیے رکن ممالک کے ساتھ لابنگ شروع کر دی جبکہ رکن ممالک پر دباؤ بھی ڈالا جارہا ہے ۔
بی سی سی آئی اور بھارتی حکومت نے ایشین کرکٹ کونسل اجلاس میں شرکت نہ کرنے کے لیے ممبر بورڈز کو پرکشس آفر ز کرنا شروع کر دی ہیں،جبکہ لابنگ میں آئی سی سی کے چیئرمین جے شاہ بھی پیش پیش ہیں ۔
رکن ممالک کو سالانہ اجلاس کے خلاف خط لکھنے کا کہا جا رہا ہے۔ سری لنکا کے بعد عمان نے بھی ڈھاکا کے سالانہ اجلاس کی مخالفت میں بھارت کی سپورٹ کر دی ہے ، ارکان کی اکثریت سالانہ اجلاس کے ڈھاکا میں ہونے کے حق میں ہے۔
ارکان کی اکثریت صدر محسن نقوی کی حمایت جاری رکھنے کا فیصلہ کیا ہے، صدر اے سی سی محسن نقوی نے 24 جولائی کو اجلاس طلب کر رکھا ہے، رکن ممالک 23 جولائی کو ڈھاکا میں اکٹھے ہوں گے جبکہ بھارت اور سری لنکا نے اجلاس ملتوی کرنے اور وینیو تبدیل کرنے کا کہا ہے۔
