نیشنل ڈیزاسٹر مینجمنٹ اتھارٹی (این ڈی ایم اے) نے مون سون بارشوں اور سیلاب کا نیا الرٹ جاری کردیا۔ جس کے مطابق خیبرپختونخوا، آزاد کشمیر، شمال مشرقی پنجاب میں 5 سے 8 جولائی کے دوران شدید بارشوں کا امکان ہے۔
این ڈی ایم اے نے مون سون بارشوں اور ممکنہ سیلاب کے حوالے سے الرٹ جاری کردیا، رپورٹ میں کہا گیا ہے کہ خیبرپختونخوا، آزاد کشمیر، شمال مشرقی پنجاب میں 5 سے 8 جولائی کے دوران شدید بارشوں کا امکان ہے، دریائے کابل میں نوشہرہ کے مقام پر پانی کے بہاؤ میں اضافہ متوقع ہے۔
نیشنل ڈیزاسٹر مینجمنٹ اتھارٹی کا کہنا ہے کہ اس دوران دریائے کابل کے منسلکہ ندی نالوں میں طغیانی کا خدشہ ہے، تربیلا ڈیم میں پانی کے بہاؤ میں اضافے کے باعث نچلے درجے کی سیلابی صورتحال پیدا ہوسکتی ہے۔
الرٹ میں کہا گیا ہے کہ گلگت بلتستان اور خیبرپختونخوا کے علاقوں میں لینڈ سلائیڈنگ، نشیبی علاقوں میں سیلاب کا خطرہ ہے، لاہور، سیالکوٹ اور نارووال میں اربن فلڈنگ کا خدشہ ہے، ڈی جی خان اور راجن پور کے ہل ٹورنٹس میں پانی کے بہاؤ میں اضافہ کا امکان ہے۔
این ڈی ایم اے نے کہا ہے کہ بارش اور تیز ہواؤں کے دوران کمزور تعمیرات، کچی دیواروں، بجلی کے کھمبوں اور بل بورڈز سے دور رہیں۔
الرٹ کے مطابق آندھی اور طوفان کے دوران حد نگاہ بھی کم ہوسکتی ہے جو حادثات کا باعث بنتی ہے لہٰذا محتاط رہیں، این ڈی ایم اے کی جانب سے متعلقہ اداروں کو ممکنہ ہنگامی صورتحال سے نمٹنے کیلئے پیشگی اقدامات کی ہدایت کی گئی ہے۔
