نائب وزیراعظم اسحاق ڈار کی امریکی وزیر خارجہ مارکو روبیو سے اتنہائی اہم ملاقات ہوئی جس دوران امریکی وزیر خارجہ مارکو روبیو نے خطے اور دنیا میں امن و استحکام کیلئے پاکستان کی مخلصانہ سفارتی اور ثالثی کوششوں کو سراہا۔
دونوں رہنماؤں نے پاکستان اور امریکا کے دوطرفہ تعلقات میں مثبت پیش رفت پر اطمینان کا اظہار کیا اور خطے سمیت عالمی صورتحال پر تبادلۂ خیال کیا۔
دونوں ممالک نے تجارت و سرمایہ کاری، سیکیورٹی اور انسداد دہشتگردی سمیت باہمی دلچسپی کے تمام شعبوں میں تعاون مزید مضبوط بنانے پر اتفاق کیا۔
فریقین نے اعلیٰ سطح کے تبادلوں اور علاقائی امن، سلامتی اور خوشحالی میں مشترکہ مفادات کی بنیاد پر پاک امریکا شراکت داری کو مزید آگے بڑھانے پر بھی اتفاق کیا۔
اسحاق ڈار اور امریکی وزیر خارجہ مارکو روبیو کے درمیان ملاقات واشنگٹن میں سٹیٹ ڈپارٹمنٹ میں ہوئی۔ اسحاق ڈار مارکو روبیو سے ملاقات کے بعد پاکستانی سفارتخانے بھی پہنچ گئے ہیں ۔
اس سے قبل نائب وزیراعظم اسحاق ڈار سرکاری دورے پر واشنگٹن پہنچے تو پاکستان کے سفیر رضوان سعید شیخ نے استقبال کیا۔
