بیرسٹر گوہر کا کہنا ہے کہ بانی پی ٹی آئی کو بڑے بڑے مائنس نہیں کرسکے، خیبرپختونخوا اسمبلی بانی پی ٹی آئی کی ہے، ووٹ بانی پی ٹی آئی کا ہے، وہ کہیں گے تو اسمبلی تحلیل کردیں گے۔
پی ٹی آئی رہنماء بیرسٹر گوہر نے جوڈیشل کمپلیکس کے باہر میڈیا سے گفتگو کرتے ہوئے کہا ہے کہ بانی پی ٹی آئی کو بڑے بڑے مائنس کرنا چاہتے تھے وہ نہیں کرسکے، کے پی کا بجٹ پاس نہیں ہوا بجٹ پاس ہونے میں ابھی بھی کچھ دن باقی ہیں۔
ان کا کہنا ہے کہ یہ بانی پی ٹی آئی کی اسمبلی ہے، ان کا ووٹ ہے وہ جیسے کہیں گے ویسا ہوگا، بانی پی ٹی آئی جو حکم کریں گے وہ ہم مانیں گے، اسمبلی تحلیل کا کہیں گے تو کردیں گے، یہ ووٹ بانی پی ٹی آئی کا ہے ہمارا ووٹ نہیں ہے۔
بیرسٹر گوہر نے کہا کہ اگر بانی پی ٹی آئی نہ ہوتے تو مجھے میرے خاندان والے بھی ووٹ نہ دیتے، عدالتوں نے مایوس کیا لیکن اللہ سے امید ہے بانی کو کہیں نہ کہیں سے تو انصاف ملے گا۔
چیئرمین پی ٹی آئی کا کہنا ہے کہ بہت عرصہ ہوگیا 300 مقدمات ہوئے جیل جانے سے پہلے بانی 350 پیشیاں بھگت چکے تھے، 5 دن کے اندر بانی پی ٹی آئی کو 3 سزائیں ہوئیں، 45 سال کی سزائیں دی گئیں، بانی پی ٹی آئی کی بیوی کو بھی سزاء سنائی گئی۔
انہوں نے جیل انتظامیہ پر الزام لگایا کہ بانی پی ٹی آئی کو کتابیں نہیں دینے دے رہے، رولز کی خلاف ورزی کرکے ملاقاتیں نہیں کرنے دیتے۔
