پاکستان پیپلز پارٹی (پی پی پی) کے چیئرمین بلاول بھٹو زرداری نے منگل کو پاکستان اور بھارت کے درمیان جنگ بندی میں سہولت کاری میں صدر ڈونلڈ ٹرمپ اور امریکی وزیر خارجہ مارکو روبیو کے کردار کا اعتراف کیا۔
اقوام متحدہ کے ہیڈ کوارٹرز میں پریس بریفنگ کے دوران سابق وزیر خارجہ بلاول بھٹو زرداری نے کہا کہ بھارت نے پاکستان پر حملے کرنے کے لیے اسرائیلی ڈرون استعمال کیے، بھارت بھی اسرائیل کی طرح عالمی قوانین کی خلاف ورزی کر رہا ہے۔
سابق وزیر خارجہ بلاول بھٹو زرداری کا کہنا تھا کہ علاقائی امن کے لیے پاکستان کے عزم کا اعادہ کرتے ہوئے، پاکستان مذاکرات کے لیے تیار ہے، ہندوستانی عوام بھی خطے میں امن چاہتے ہیں۔
انہوں نےکہا کہ پاکستانی حدود میں ہندوستان کے غیر مجاز حملوں کی مذمت کی۔ میں یہاں بھارت کے ساتھ حالیہ کشیدگی کے حوالے سے پاکستان کا موقف پیش کرنے آیا ہوں۔ اس سال 7 مئی کو بھارت نے پاکستان کے اندر غیر قانونی حملے کیے تھے۔
بلاول بھٹو زرداری کا کہنا تھا کہ یہ اقدامات اقوام متحدہ کے چارٹر اور بین الاقوامی قوانین کی خلاف ورزی ہیں، شہری انفراسٹرکچر کو نشانہ بنایا گیا ہے۔ مذہبی مقامات کو نشانہ بنایا گیا۔ ڈیموں، معصوم شہریوں اور بچوں پر حملہ کیا گیا جن میں سے بہت سے اپنی جانیں گنوا بیٹھے ہیں۔
پاکستان پیپلز پارٹی (پی پی پی) کے چیئرمین بلاول بھٹو زرداری نے مودی حکومت کو تنقید کا نشانہ بناتے ہوئے کہا تھا کہ مودی انتظامیہ انسانی حقوق کی خلاف ورزی کر رہی ہے۔
انہوں نے عالمی برادری سے اپیل کی کہ وہ بھارت کو وارننگ جاری کرے اور حالات کو مزید خراب ہونے سے روکنے پر زور دے۔
