متحدہ عرب امارات نے اوپیک اور اوپیک پلس سے علیحدگی کا اعلان کر دیاہے ، جس سے تیل برآمد کرنے والے ان گروپوں کو بڑا دھچکا پہنچا ہے۔
تفصیلات کے مطابق متحدہ عرب امارات کی جانب سے یہ فیصلہ ایسے وقت میں کیا گیاہے جب ایران ، امریکہ اور اسرائیل کے درمیان جنگ کے باعث آبنائے ہرمز بندش کا شکار ہے جبکہ امریکہ نے ناکہ بندی بھی کر رکھی ہے۔
متحدہ عرب امارات کا کہناتھا کہ یکم مئی سے اوپیک اور اوپیک پلس کو چھوڑ دیں گے،اوپیک سے علیحدگی کا فیصلہ قومی مفادات کے تحت کیا گیا،اوپیک عالمی منڈی کی ضروریات کو پورا کرنے میں فعال کردار ادا کرے۔
اوپیک کے خلیجی ممالک پہلے ہی اپنی برآمدات کو آبنائے ہرمز کے ذریعے بھیجنے میں مشکلات کا شکار تھے۔ یہ ایک تنگ گزرگاہ ہے جو ایران اور عمان کے درمیان واقع ہے، اور عام حالات میں دنیا کے تقریباً پانچویں حصے کے خام تیل اور مائع قدرتی گیس (LNG) کی ترسیل اسی راستے سے ہوتی ہے۔
