سابق وزیر اعظم عمران خان پاکستان تحریک انصاف ( پی ٹی آئی ) کے پیٹرن انچیف بن گئے۔
منگل کے روز اڈیالہ جیل کے باہر میڈیا سے گفتگو کرتے ہوئے چیئرمین پی ٹی آئی بیرسٹر گوہر کا کہنا تھا کہ عمران خان نے کہا ہے وہ آج کے بعد پی ٹی آئی کے پیٹرن انچیف ہوں گے اور تمام فیصلے وہی کریں گے جس طرح پہلے کرتے تھے۔
چیئرمین پی ٹی آئی کا کہنا تھا کہ مجھے چیئرمین شپ سے ہٹانے کی باتیں افواہیں پھیلانے والے کر رہے ہیں، بانی پی ٹی آئی پیٹرن ان چیف ہیں اور میں پارٹی کا چیئرمین رہوں گا، پارٹی کا چیئرمین نہ ہونے کی صورت میں سب کو پتہ ہے نتائج کیا ہوں گے۔
بیرسٹر گوہر کا کہنا تھا کہ احتجاج کی ذمہ داری ہمیشہ وزیر اعلیٰ خیبرپختونخوا علی امین گنڈا پور کو دی جاتی تھی اب ایسا نہیں اور اس حوالے سے مختلف لوگوں کو مختلف ذمہ داریاں دی جائیں گی، بانی نے پارٹی لیڈر شپ پر کوئی عدم اعتماد نہیں کیا ہے، ان کو معلوم ہے لوگوں نے قربانیاں دی ہیں۔
ان کا کہنا تھا کہ میری ہمیشہ کوشش رہی ہے مسائل بات چیت سے حل ہوں اور میں ابھی بھی چاہتا ہوں مسائل بات چیت کے ذریعے حل ہوں لیکن بانی نے کہا ہے ہمارے لیے کوئی راستہ نہیں چھوڑا گیا، انہوں نے ہمیشہ لچک کا مظاہرہ کیا ہے، اس لیے احتجاجی تحریک کے علاوہ کوئی راستہ نہیں۔
انہوں نے بتایا کہ بانی نے کہا اسلام آباد کی کال دینے کے بجائے پورے ملک میں احتجاج ہوگا اور احتجاجی تحریک کو وہ خود لیڈ کریں گے جبکہ تحریک کے حوالے سے تمام ہدایات عمر ایوب کو دی جائیں گی۔
بیرسٹر گوہر کا مزید کہنا تھا کہ بانی پی ٹی آئی نے احتجاج کا ابھی کوئی ٹائم فریم نہیں دیا وہ خود دیں گے۔
