پاکستان نے شام کی خودمختاری، اتحاد اور سالمیت کی مکمل حمایت کا اعادہ کرتے ہوئے دوطرفہ تعلقات کو مزید مستحکم بنانے کے عزم کا اظہار کیا ہے۔
دفتر خارجہ کے ترجمان کے مطابق پاکستانی وفد نے شامی وزیر خارجہ اسعد الشیبانی سے دمشق میں ملاقات کی، جس میں دوطرفہ تعاون کے مختلف پہلوؤں پر تبادلہ خیال کیا گیا۔
پاکستانی وفد کی قیادت ایڈیشنل سیکرٹری خارجہ برائے مشرق وسطیٰ شہریار اکبر خان نے کی۔ملاقات کے دوران دونوں ممالک نے دیرینہ اور دوستانہ تعلقات کو مزید وسعت دینے پر زور دیا،اور سفارتی وفود کے تبادلے کو تیز کرنے سمیت باہمی تعاون کو فروغ دینے پر اتفاق کیا۔
دفتر خارجہ کے مطابق فریقین نے خطے میں امن، ترقی اور یکجہتی کے لیے قریبی رابطے کو اہم قرار دیا۔پاکستان نے واضح کیا کہ وہ شام کی خودمختاری، جغرافیائی سالمیت اور قومی وحدت کے اصولوں کا مکمل احترام کرتا ہے۔
شام کے وزیر خارجہ اسعد الشیبانی نے بھی پاکستانی وفد کا شکریہ ادا کرتے ہوئے مختلف شعبوں میں تعاون بڑھانے کی خواہش کا اظہار کیا۔ دونوں ممالک نے مستقبل میں مختلف سطحوں پر روابط کو مضبوط بنانے پر رضامندی ظاہر کی۔
