فیلڈ مارشل سید عاصم منیر نے کہا ہے کہ پاکستان بھارت کی اجارہ داری کبھی قبول نہیں کرے گا۔
مختلف جامعات کے وائس چانسلرز اور سینئر اساتذہ سے بات چیت کرتے ہوئے فیلڈ مارشل سید عاصم منیر کا کہنا تھا کہ اساتذہ کرام پاکستان کا سب سے بڑا سرمایہ ہیں اور میں آج جو کچھ بھی ہوں اپنے والدین اور اساتذہ کرام کی وجہ سے ہوں۔
فیلڈ مارشل کا کہنا تھا کہ پاکستان کی اگلی نسلوں کی کردار سازی اساتذہ کی ذمہ داری ہے اور آپ نے پاکستان کی کہانی اپنی اگلی نسلوں کو بتانی ہے۔
سید عاصم منیر کا کہنا تھا کہ معرکہ حق میں اللہ تعالیٰ نے ہر طرح سے پاکستان کی مدد کی اور جب قوم آہنی دیوار بن جائے تو دنیا کی کوئی طاقت اُسے گرا نہیں سکتی جبکہ بھارت کے خلاف معرکہ حق سے یہ بات ثابت بھی ہو گئی ہے۔
ان کا کہنا تھا کہ کشمیر کا کوئی بھی سودا ممکن نہیں اور ہم کبھی بھی کشمیر کو نہیں بھول سکتے، ہندوستان بھی جان لے کہ پاکستان کشمیر کو کبھی نہیں چھوڑے گا۔
انہوں نے کہا کہ بھارت نے کئی دہائیوں سے کشمیر کے مسئلے کو دبانے کی کوشش کی لیکن بھارت کشمیر کا مسئلہ دبانے میں ناکام ہو چکا ہے اور اب یہ ممکن نہیں رہا جبکہ دہشت گردی بھارت کا اندرونی اور کشمیر ایک عالمی سطح کا مسئلہ ہے۔
فیلڈ مارشل کا کہنا تھا کہ بھارت میں دہشت گردی کی بنیادی وجہ اقلیتوں خصوصاً مسلمانوں پر بڑھتا ظلم اور تعصب پسندی ہے۔
سید عاصم مینر نے کہا کہ بلوچستان میں دہشت گرد فتنہ الہندوستان ہیں جن کا بلوچوں سے کوئی تعلق نہیں۔
انہوں نے کہا کہ ہم نے پاکستان کو ایسی مضبوط ریاست بنانا ہے جہاں تمام ادارے قانون و آئین کے تحت بغیر کسی سیاسی دباؤ یا فائدے کے عوام کی فلاح و بہبود کیلئے کام کریں اور جو بھی ریاست کو کمزور بنانے کا بیانیہ بنانے کی کوشش کرے اس کی نفی کریں۔
ان کا مزید کہنا تھا کہ پانی پاکستان کی ریڈ لائن ہے اور 24 کروڑ پاکستانیوں کے اس بنیادی حق پر آنچ نہیں آنے دیں گے۔
شرکا نے سوال و جواب سیشن میں اظہار خیال کرتے ہوئے کہا کہ یہ جو محفوظ دھرتی ہے ، اس کے پیچھے وردی ہے اورہمیں پاکستان اور اپنی مسلح افواج پر فخر ہے جبکہ ہم ان کے شانہ بشانہ کھڑے رہیں گے۔
