پی ڈی ایم اے پنجاب نے 27 مئی سے 31 مئی کے دوران آندھی، گرد آلود ہواؤں اور بارشوں کے پیش نظر الرٹ جاری کر دیا ہے۔ ترجمان پی ڈی ایم اے کے مطابق پنجاب کے بیشتر اضلاع میں تیز ہواؤں کے ساتھ بارش کا امکان ہے۔
ترجمان کے مطابق راولپنڈی، مری، گلیات، اٹک، چکوال، منڈی بہاؤالدین، گجرات، جہلم اور گوجرانوالہ میں آندھی اور بارش کی پیش گوئی کی گئی ہے، جبکہ لاہور، قصور، سیالکوٹ، نارووال، اوکاڑہ، فیصل آباد، ٹوبہ ٹیک سنگھ، جھنگ، خوشاب، سرگودھا اور میانوالی میں بھی بارش کے امکانات ہیں۔
جنوبی پنجاب کے اضلاع ملتان، ڈیرہ غازی خان، بہاولپور اور بہاولنگر میں بھی 27 سے 30 مئی کے دوران بارش کی پیش گوئی کی گئی ہے۔
ڈی جی پی ڈی ایم اے عرفان علی کاٹھیا کے مطابق وزیراعلیٰ پنجاب کی ہدایت پر تمام ضلعی انتظامیہ کو الرٹ کر دیا گیا ہے۔ بارشوں کے باعث صوبے میں جاری ہیٹ ویو اور شدید گرمی کی شدت میں کمی آنے کا امکان ہے۔
پی ڈی ایم اے نے اسکول ایجوکیشن، محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک سمیت متعلقہ اداروں کو بھی پیشگی احتیاطی اقدامات کی ہدایات جاری کر دی ہیں۔
