بین الاقوامی مالیاتی اداروں آئی ایم ایف اور عالمی بینک کے مطالبے پر پنشن اصلاحات پر عملدرآمد کے سلسلے میں اہم پیش رفت سامنے آئی ہے ، ایف بی آر نے ریٹائرمنٹ کے بعد دوبارہ سرکاری ملازمت حاصل کرنے والے ملازمین کا مکمل ریکارڈ طلب کر لیا۔
ذرائع کے مطابق ایف بی آر نے تمام فیلڈ فارمیشنز کو باقاعدہ مراسلہ جاری کرتے ہوئے ہدایت کی ہے کہ گریڈ 1 سے 16 تک کے ان تمام ملازمین کا ریکارڈ 26 مئی تک فراہم کیا جائے، جنہوں نے ریٹائرمنٹ کے بعد کسی بھی حیثیت ریگولر یا کنٹریکٹ میں دوبارہ ملازمت اختیار کی۔
مراسلے میں کہا گیا ہے کہ ریٹائرمنٹ کی تاریخ، نئی ملازمت کے حصول کی مدت اور تنخواہ و پنشن سے متعلق تمام تفصیلات مہیا کی جائیں۔ اس کے علاوہ، ایف بی آر نے واضح کیا ہے کہ 60 سال کی عمر کے بعد پنشن یا نئی سرکاری ملازمت کی تنخواہ میں سے صرف ایک کا انتخاب کرنا ہوگا۔
یاد رہے کہ وزارت خزانہ پہلے ہی دہری پنشن اور پنشن و تنخواہ ایک ساتھ لینے پر پابندی عائد کر چکی ہے۔ اب یہ تمام معلومات حاصل کر کے ایف بی آر خزانہ ڈویژن کو مکمل ریکارڈ ارسال کرے گا۔
