قومی کرکٹرز کے نئے سال کیلئے سینٹرل کنٹریکٹس کے معاملے پر مشاورتی عمل جاری ہے، فنانشل اسٹرکچر میں تبدیل کا امکان نہیں، بعض کھلاڑیوں کی کیٹیگریز میں رد و بدل کیا جاسکتا ہے۔
قومی کرکٹرز کے سینٹرل کنٹریکٹس 2025-26 کے معاملے پر ابتدائی مشاورتی عمل جاری ہے۔
ذرائع کے مطابق سینٹرل کنٹریکٹس کے فنانشل اسٹرکچر کا یہ تیسرا اور آخری سال ہے،تین سالہ فنانشل اسٹرکچر کی منظوری ذکاء اشرف کے دور میں 2023ء میں دی گئی تھی۔
چئیرمین پی سی بی محسن نقوی نے گزشتہ برس بھی فنانشل اسڑکچر میں کوئی تبدیلی نہیں کی تھی، فنانشل اسٹرکچر میں اگلی مدت کیلئے بھی تبدیلی نہیں کی جائے گی۔
ذرائع کا کہنا ہے کہ سینٹرل کنٹریکٹس میں بڑے پیمانے پر تبدیلی کا امکان نہیں ہے، بعض کھلاڑیوں کی کیٹیگریز میں ردو بدل کیا جاسکتا ہے، ڈومیسٹک کے پرفارمرز کو ایمرجنگ کی صورت میں ڈی کیٹیگری میں شامل کیا جائے گا۔
قومی کرکٹرز کے سینٹرل کنٹریکٹس کی مدت 30 جون کو ختم ہوگی، گزشتہ برس پی سی بی نے 27 اکتوبر کو سینٹرل کنٹریکٹس یافتہ کھلاڑیوں کا اعلان کیا تھا، گزشتہ برس اے میں 2، بی میں 3، سی میں 9 اور ڈی کیٹیگری میں 11 کھلاڑی شامل تھے۔
