وزیر اعلیٰ پنجاب مریم نواز نے گندم کی خریداری کے عمل کو شفاف، مؤثر اور جدید بنانے کے لیے الیکٹرونک ویئر ہاؤس ریسٹ سسٹم کی منظوری دے دی۔
ذرائع کے مطابق وزیر اعلیٰ مریم نواز نے اس نظام کے فوری نفاذ کو یقینی بنانے کی ہدایت جاری کرتے ہوئے وزیر خزانہ کی سربراہی میں ایک سٹیرنگ کمیٹی تشکیل دے دی ہے جو روزانہ کی بنیاد پر پیش رفت کی رپورٹ وزیر اعلیٰ کو پیش کرے گی۔
مریم نواز نے معاملہ ہنگامی بنیادوں پر کابینہ سے منظوری کے لیے پیش کرنے کی بھی ہدایت کی ہے تاکہ سسٹم کا اطلاق جلد ممکن ہو سکے۔
الیکٹرونک ویئر ہاؤس ریسٹ سسٹم سے ذخیرہ شدہ گندم کی شفاف نگرانی اور فوری ڈیجیٹل اندراج کے ذریعے ریسیورز کو بروقت ادائیگی ہوسکے گی جبکہ کسانوں کو جعلی رسیدوں اور دھوکہ دہی سے تحفظ دیا جاسکے گا۔
سسٹم سے سرکاری و نجی گوداموں کے معیار کی خودکار جانچ پڑتال کی جاسکے گی۔
سسٹم سے زرعی مصنوعات کی قیمتوں میں استحکام کے لیے درست اعداد و شمار کی دستیابی یقینی بنے گی جبکہ مارکیٹ تک آسان رسائی اور لوجسٹکس کے اخراجات میں کمی ہوگی اور بینکوں کے لیے فصل پر قرضوں کی منظوری میں آسانی اور شفافیت ہوسکے گی۔
