کراچی کے علاقے کلفٹن میں گلف ٹاور کے قریب فلیٹ میں گیس لیکیج کے باعث دھماکے کے نتیجے میں گھریلو ملازمہ جاں بحق اور لڑکی سمیت 2 افراد جھلس کر زخمی ہوگئے۔
رپورٹ کے مطابق کلفٹن تین تلوار گلف ٹاور کے قریب فلیٹ میں گیس لیکیج کے باعث دھماکے کے نتیجے میں 2 جوان لڑکیوں سمیت 3 افراد جھلس کر شدید زخمی ہوگئے جنہیں فوری طور پر ایدھی ایمبولینس کے ذریعے سول اسپتال کے برنس وارڈ منتقل کردیا گیا۔
اسپتال انتظامیہ کے مطابق دوران علاج شدید زخمی ہونیوالی 20 سالہ کلثوم دم توڑ گئی، زخمی ہونے والوں میں 20 سالہ سدرہ اور50 سالہ فیاض شامل ہیں۔
ایس ایچ او کلفٹن نے بتایا کہ فیاض 80 فیصد جھلسا ہوا ہے اور اس کی حالت تشویشناک ہے، جاں بحق کلثوم گھریلو ملازمہ تھی۔
انہوں نے بتایا کہ لیکیج کے باعث گیس فلیٹ میں بھری ہوئی تھی، گھریلو ملازمہ نے باورچی خانے میں جیسے ہی چولہا جلایا تو دھماکے کے باعث آگ بھڑک اٹھی، پولیس حادثے سے متعلق مزید معلومات اکٹھا کررہی ہے۔
