امریکی محکمہ خارجہ میں جنوبی وسطی ایشیاء امور کے اعلی عہدے دار ایرک مائیر نے پاکستان منرلز انویسٹمنٹ فورم 2025 کے انعقاد پر خراج تحسین پیش کیا ہے ۔
تفصیلات کے مطابق دو روزہ پاکستان منرلز انویسٹمنٹ فورم 2025 کا افتتاحی اجلاس آج منعقد ہوا ، افتتاحی تقریب میں ملکی اور غیر ملکی معاشی ماہرین و مندبین کی شرکت۔
افتتاحی تقریب میں شریک امریکی وزارت خارجہ کے اعلی عہدے دار ایرک مائیر کا کہنا تھا کہ میں پاکستان کی مہمان نوازی سے لطف اندوز ہو رہا ہوں، پاکستانی حکام کو اس فورم کے کامیاب انعقاد پر خراج تحسین پیش کرتا ہوں، امید ہے کہ اس فورم کے انعقاد سے امریکہ اور پاکستان کے تعلقات مزید مضبوط ہوں گے۔
ایرک مائیر نے توقع ظاہر کی کہ یہ فورم سرمایہ کاروں کے لیے یکساں مواقع فراہم کرے گا ۔ ان کا کہناتھا کہ امریکی صدر ڈونلڈ ٹرمپ نے بھی منرل اور معدنی وسائل کی اہمیت کو متعدد بار اجاگر کیا ہے ، حالیہ دنوں میں پاکستان اور امریکہ کے مابین کامیاب سرمایہ کاری کے کئی حوالے ہیں ، دونوں ممالک کے مابین سویابین کی تجارت کا دوبارہ آغاز باعث مسرت ہے ۔
ان کا کہناتھا کہ 260 ہزار ٹن سویابین سے لدے چار جہاز حال ہی میں پاکستان پہنچے ہیں ، یہ تجارتی روابط دونوں ممالک کے عوام کے مابین گہرے تعلقات کی نشاندہی کرتے ہیں ، متعدد پاکستانیوں نے امریکہ میں ایکسچینج پروگرام کے تحت تعلیم حاصل کی ہے ، یہ اقدامات پاکستانی اور امریکی عوام کے مابین گہرے رشتے کے عکاس ہیں۔
