آرمی چیف جنرل عاصم منیر نے کہاہے کہ پاک فوج دہشت گردوں کی مالی اعانت کےخلاف سخت قانونی اقدامات میں مکمل تعاون فراہم کرے گی۔
آرمی چیف جنرل عاصم منیر کی زیر صدارت 268ویں کور کمانڈرز کانفرنس ہوئی جس دوران فورم نے شہدا کے ایصال ثواب کیلئے فاتحہ خوانی کی ، شہدائے افواج پاکستان،قانون نافذ کرنے والے اداروں،شہریوں کی قربانیوں کوخراجِ عقیدت پیش کیا گیا ۔
کور کمانڈر کانفرنس کے دوران خطےکی موجودہ صورتحال،قومی سلامتی کو درپیش چیلنجز پر ، بڑھتے خطرات کے جواب میں پاکستانی حکمت عملی کے بارے میں جامع بریفنگ دی گئی جبکہ کانفرنس میں علاقائی،داخلی سلامتی کی صورتحال کا تفصیلی جائزہ لیا گیا،
فورم نے ہر قیمت پر بلاتفریق دہشتگردی ختم کرنے کے عزم کا اعادہ کیا اور کہا کہ پاکستان کو غیر مستحکم کرنے والے عناصر سے ریاست پوری طاقت سے نمٹے گی، سہولت کاروں،حوصلہ افزائی کرنے والوں سے ریاست پوری طاقت سے نمٹے گی، کسی کو بلوچستان کے امن میں خلل ڈالنے کی اجازت نہیں دی جائے گی۔
شرکاء کا کہناتھا کہ بلوچستان کے استحکام میں خلل ڈالنے والے سیاسی مفادات،سماجی عناصر کو ناکام بنائیں گے، ملکی،غیر ملکی عناصر کا چہرہ،گٹھ جوڑ،انتشار پھیلانے،پروان چڑھانے کی کوششیں بے نقاب ہو چکیں۔ فورم نے اعادہ کیا کہ ایسے عناصر،کوششیں کرنے والوں کو کوئی معافی نہیں دی جائے گی۔
کور کمانڈر کانفرنس کے دوران نیشنل ایکشن پلان کے تحت"عزمِ استحکام"کی حکمت عملی کے تیز اور مؤثر نفاذ پر زور دیا گیا ، فورم نے دہشتگردی کیخلاف قوم کے تعاون سے مشترکہ نقطہ نظرکی اہمیت کو بھی اُجاگر کیا۔ فورم کا کہنا تھا کہ ریاستی ادارے آئین کے دائرے میں رہتے ہوئے قانون پر پوری استقامت سے عمل کریں گے۔شرکاء کا کہناتھا کہ قانون کی عملداری میں کسی قسم کی نرمی اور کوتاہی نہیں برتی جائے گی۔
آرمی چیف جنرل عاصم منیر نے میں نیشنل ایکشن پلان کے تحت قائم ضلعی رابطہ کمیٹیوں کے آغاز کو سراہا اور بغیر کسی رکاوٹ نیشنل ایکشن پلان کے تیز نفاذ کی ضرورت پر زور دیا۔ ان کا کہناتھا کہ پلان کے نفاذ میں حکومتی ہدایات کے مطابق ادارے ہم آہنگی اور تعاون یقینی بنائیں، فوج حکومت،اداروں کو دہشتگردوں کی مالی اعانت کیخلاف مکمل تعاون فراہم کرے گی، غیرقانونی سرگرمیاں دہشتگردی کی مالی معاونت سے اندرونی طور پر جڑی ہوئی ہیں۔پاکستان میں دہشتگردوں اور ان کے سہولت کاروں کیلئے کوئی جگہ نہیں۔
فورم نے بھارت کی مقبوضہ کشمیر میں انسانی حقوق کی خلاف ورزیوں پر تشویش کا اظہار کیا ۔ فورم نے ایل اوسی پر بھارتی فوج کی جنگ بندی کی خلاف ورزیوں پر بھی خدشات ظاہر کیےاور مقبوضہ کشمیر کے عوام کے حقوق کیلئے پاکستان کی حمایت پر زور دیا۔
آئی ایس پی آر کے مطابق عالمی سطح پر مقبوضہ کشمیر میں خلاف ورزیاں اُجاگر کرنے کیلئے سفارتی کوششوں پر زور دیا گیا ۔ فورم نے فلسطینی عوام کے ساتھ مکمل یکجہتی کااظہار کیا اور غزہ میں سنگین انسانی حقوق کی خلاف ورزیوں اور جنگی جرائم کی بھی مذمت کی ۔فورم نے فلسطینی عوام کو غیر متزلزل سفارتی، سیاسی، اخلاقی حمایت فراہم کرنے کا اعادہ کیا ۔
آرمی چیف نے فیلڈ کمانڈرز کو آپریشنل تیاری،پیشہ ورانہ مہارت کا اعلیٰ معیار برقرار رکھنے کی ہدایت کی اور بہترین جنگی تیاریاں برقرار رکھنے کیلئے سخت تربیت یقینی بنانے پر بھی زور دیا۔
