کوئٹہ میں ڈبل روڈ پر پولیس موبائل کے قریب زور دار دھماکے میں 3 افراد جاں بحق اور اہلکاروں سمیت 20 سے زائد افراد زخمی ہوگئے، کئی گاڑیوں کو بھی نقصان پہنچا۔
کوئٹہ کے علاقے ڈبل روڈ پر پولیس موبائل کے قریب زور دار دھماکا ہوا، دھماکے میں موبائل تباہ ہوگئی، کئی گاڑیوں کو بھی نقصان پہنچا، واقعے میں 3 افراد جاں بحق اور 20 سے زائد زخمی ہوگئے، جنہیں سول اسپتال منتقل کردیا گیا۔
پولیس سرجن کوئٹہ ڈاکٹر عائشہ کا کہنا ہے کہ دھماکے میں 21 افراد زخمی ہوئے، 3 لاشیں سول اسپتال لائی گئیں، زخمیوں میں 4 کی حالت تشویشناک ہے، زخمیوں میں 4 پولیس اہلکار بھی شامل ہیں۔
پولیس کا کہنا ہے کہ بم موٹر سائیکل میں نصب تھا، جیسے ہی پولیس وین قریب پہنچی دھماکا ہوگیا۔
پولیس کی بھاری نفری نے جائے وقوعہ کو گھیرے میں لے لیا، امدادی ٹیمیں بھی متاثرہ مقام پر پہنچ گئیں۔
ایم ڈی ٹراما سینٹر سول اسپتال کا کہنا ہے کہ دھماکے کے 17 زخمی سول اسپتال لائے گئے ہیں، زخمیوں میں پولیس اہلکار بھی شامل ہیں، سول اسپتال میں ایمرجنسی نافذ کردی گئی ہے، ڈاکٹرز، پیرامیڈکس اور طبی عملہ طلب کرلیا گیا ہے۔
ابتدائی تحقیقات کے مطابق دھماکا موٹر سائیکل میں نصب ریموٹ کنٹرول کے ڈیوائس کے ذریعے کیا گیا، جس میں ڈھائی کلو گرام بارودی مواد استعمال کیا گیا تھا۔
