وزیرتوانائی اویس لغاری نے سابق وزیر خزانہ مفتاح اسماعیل کے بیان پر ردعمل دیتے ہوئے کہا کہ مفتاح اسماعیل نے غلط اعداد و شمار پیش کر کے عوام کو گمراہ کرنے کی کوشش کی ہے ۔
اویس لغاری کا کہناتھا کہ قابل تجدید توانائی کا فروغ حکومت کی ترجیح ہے، حکومت نے عوام کو سولر پینلز لگانے کی ترغیب دی، نیٹ میٹرنگ کے قواعد میں تبدیلی کے بعد سولر کی قیمتیں کم ہوئیں، 4 ہزار میگاواٹ سے زائد سولر سے حاصل ہونے والی بجلی سسٹم میں داخل ہو چکی ہے، اگلے 8 سال کے اندر سولر نیٹ میٹرنگ کی تعداد 12 ہزار میگاواٹ سے بڑھ جائے گی۔
اویس لغاری کا کہناتھا کہ مستقبل کے صارفین 3 سے 4سال میں اپنی سرمایہ کاری کی رقم پوری کریں گے، موجودہ نیٹ میٹرنگ صارفین کے معاہدے پرانے نرخوں کے مطابق رہیں گے، دنیا کے کئی ممالک میں نیٹ میٹرنگ کی قیمت ایڈجسٹ کی جاتی ہے، باہمی اتفاق اورمشورے سے آئی پی پیز کے معاہدوں میں نظرثانی ہوچکی ہے، آئی پی پیز معاہدوں پر نظرثانی سے 1500ارب سے زائد کا فائدہ حاصل کیا گیاہے۔
اویس لغاری نے کہا کہ بجلی کی قیمتوں میں کمی کے ذریعے عوام تک جلد منتقل کیا جائے گا، پچھلے سال قومی گرڈ پر 55 فیصد سے زائد کلین انرجی تھی، اگلے چند سال میں کلین گرین انرجی کی شرح 85 فیصد تک پہنچ جائےگی، پاکستان میں کلین گرین انرجی گرڈ ہونے پر فخر ہونا چاہیے، تنقید برائے تنقید کےبجائے تعمیری تجاویز کا خیرمقدم کیا جائے گا۔
